Jesus kwa wizire pevhu a ya udise mbudi zongwa zoUhompa waKarunga. Mokulikida eyi Jesus nga ka rugana ngaHompa, Jehova kwa mu pere mpepo zokupongoka a rugane yitetu. Age kwa verwire nkenye uvera. Nkenye oku nga zi vaveli ngava mu wizire, makura ta va verura. Vatwiku ngava mono, yipurupuru ngayi zuvhu, yirema ngayi gendi ano ava ngadi hepeke nompepo donondona va mangurukire. Nampili ava ngava gumu konyerera zosikoverero sendi va verukire. Vantu ngava kwama Jesus nkenye oku nga zi. Nampili apa ga here kukara gelike, awo ngava mu wizire nye kapi nga va tengwida.

Ezuva limwe, vantu kwa retere mugara gosirema membo oku ga kere Jesus. Monzugo kwa zulire vantu ano kapi va vhulire kuhwilira mo. Makura tava tomona mbando zonzugo nokuhegumwisira mugara ogo kwaJesus. Jesus ta tantere mugara ogo asi: ‘Katuka,o gende.’ Mugara ta tameke kugenda. Vantu navenye kwa tetukire unene.

Ezuva limwe, apa Jesus ga pitire momukunda gumwe, vagara murongo woyingondwe kwa sikeme koure nokuzigira unene asi: ‘Jesus, tu vatera!’ Posiruwo sina, vanayingondwe kapi ngava va pulisire va kare pepi novantu wopeke. Jesus ta va tantere va ze kontembeli, morwa yimo za tente Veta zaJehova. Hava za mokugenda, tava veruka. Ano gumwe po eyi ga limona asi ana veruka,  ta tengura a ya pandure Jesus naKarunga. Movagara navenye 10, gumwe tupu ga tengwire a ka pandure Jesus.

Mukadi ogu ga verere nomvhura 12 kwa here kuveruka. Age kwa tundilire konyima zaJesus makura ta gumu konyerera zokosikoverero sendi. Poopo ngoso, ta veruka. Apa ya horokere oyo, Jesus ta pura asi: “Ogu ana gumu nge yilye?” Mukadi ogo kwa tukukire, makura ta wiza kwaJesus nokulihorora asi yige ana mu gumu. Jesus ta mu hengagwida nokumutantera asi: ‘Munwange, zende nombili.’

Tapa wiza mugara gedina Jairusa ogu ga likwamberere Jesus asi: ‘Tu ze kembo lyange, munwange gomukadona kuna kuvera unene.’ Komeho Jesus a ka sike kembo lyaJairusa, mukadona ta fu. Apa Jesus ga ka sikire, ta ka gwana vantu kuna kulira. Ta va tantere asi: ‘Mwa ha lira, kapi ana fu, kuna rara.’ Makura ta kwata ewoko lyomukadona nokutanta asi: “Mukadona, pinduka!” Poopo ta pinduka, makura Jesus ta tantere vakondi vendi va mu pe ko nondya a lye. Gazara tupu ruhafo oru va kere naro vakondi vendi!