Jesu naatile fa lifasi kuto kutaza taba yende ya Mubuso wa Mulimu. Kuli abonise zakaeza Jesu hakaba Mulena, Jehova naamufile moya okenile kuli aeze limakazo. Naakona kufolisa butuku bufi kamba bufi. Kwanaaya kaufela, bakuli nebatahanga ku yena kuto kupa tuso, mi naabafolisanga kaufelaa bona. Libofu nebabona, batu bane basa utwi nebautwa, batu baba omelezi luñañali nebazamaya, ni bane banani madimona neba lukululwanga. Nihaiba feela hane baswalanga kwa mungundo wa siapalo sahae, nebafolanga. Batu nebalatelelanga Jesu kwanaaya kaufela. Nihaiba ka nako yanaabatanga kuba anosi, Jesu naasa lelekisangi batu.

Nako yeñwi, batu batisa muuna yanaaomelezi luñañali kwandu yanaapila Jesu. Kono ndu yeo neitezi hahulu batu kuli mane nebasa koni kukena mwahali. Kacwalo, bapunya lisuba fahalimwaa situwa ni kushetumukiseza muuna yo fafasi ku Jesu. Cwale Jesu abulelela muuna yo kuli: ‘Yema uzamaye.’ Hanaaezize cwalo, batu nebakomokile hahulu.

Nako yeñwi hape, Jesu hanaakena mwa munzi omuñwi, baana ba 10 bane bakula mbingwa bayemela kwahule ni kuhuwa kuli: ‘Jesu, lutuse!’ Mwa mazazi ao, ba mbingwa nebasa lumelezwi kutaha fakaufi ni babañwi. Jesu abulelela baana bao kuya kwa tempele, sina feela mone ubulelela Mulao wa Jehova ka za zene baswanela kueza ba mbingwa hase bafolile. Hane banze baya kwa  tempele, bafola. Alimuñwi ku bane bakula mbingwa hasaalemuhile kuli ufolile, akuta kuto itumela ku Jesu ni kulumbeka Mulimu. Kwa batu ba 10, ki yena feela yanaaitumezi ku Jesu.

Musali yanaakulile ka lilimo ze 12 naaziyelehile mi naabata luli kufoliswa. Ataha kwamulaho wa Jesu mwahalaa buñata bwa batu mi aswala kwa mungundo wa siapalo sahae. Honafo, afola. Zeo hane liezahala, Jesu abuza kuli: “Ki mañi yanisweli?” Musali yo naasabile hahulu, kono ataha kwapili ni kuto mubulelela niti. Jesu amuomba-omba ka kubulela kuli: ‘Mwanaka, uzamaye ka kozo.’

Nduna yanaabizwa Jairusi akupa Jesu ali: ‘Taha kwa ndu yaka! Mwanaaka wamusizana ukula hahulu.’ Kono pili Jesu asika fita kale kwa ndu ya Jairusi, musizana ashwa. Jesu hasaafitile, abona kuli batu babañata nebatile kuto lila ni ba lubasi. Jesu ababulelela kuli: ‘Musike mwalila; ulobezi feela.’ Cwale aswala lizoho la musizana ni kubulela kuli: “Mwanana, zuha!” Honafo ayema, mi Jesu abulelela bashemi bahae kuli bamufe za kuca. Munahane feela mone baikutwezi bashemi bahae!