Yesu wenjili hamaseki nakushimwina nsañu yayiwahi yaWanta waNzambi. Yehova wamwinkeli Yesu spiritu yajila yakukoña yihayamisha kulonda amwekeshi yuma yakelayi neyi nekali dehi Mwanta. Wokileña yikatu yejima. Kwejima kwayileñayi antu akata enjileña nawu ayikwashi nawa wayuukileña ejima. Amputamesu atachikili kumona, anjika matu atachikili kutiya, akata kalepa atachikili kwenda nawa adiña nawandemoni wayifumishileña. Hela chakwila akwata hohu kwishina dachakuvwala chindi akoleleña. Antu amulondeleleña Yesu kwejima kwayileñayi. Nihampinji yakeñeleñayi kwikala nkawindi, hayihañileñaku.

Mpinji yimu, antu aleteli iyala wakata kalepa kwitala kwashakamineñayi Yesu. Ilaña mwitala mwadiña antu amavulu nankashi chakwila akañenyi kwiñila. Dichi alamwini hewulu detala nawa amuzenzumwinini owu muntu hadiñayi Yesu. Kuhiñahu Yesu wamulejeli owu iyala nindi: ‘Nyamukaku wendi.’ Chatachikiliyi kwenda, antu ahayamini.

Mpinji yikwawu, Yesu cheñililiyi mumukala wumu, mwadiña amayala 10 akambumba emeneni hahalehi nakubidika nawu: ‘Yesu, tukwashi!’ Munana mafuku, antu akata mbumba hiyayitejeleña kuswina kwakwihi nawantu abula kukataku. Yesu wayilejeli nindi ayi kutembeli, neyi chahosheli Nshimbi jaYehova nawu dichatela kwilayi muntu wakata mbumba neyi anamuuki. Chayileñawu kutembeli, akoleli. Mukambumba  wumu hadi awa amayala chamweniyi nindi anamuuki, wafuntili nakumusakilila Yesu nikumushimeka Nzambi. Hadi awa amayala 10, iwu wumu hohu diwamusakililili Yesu.

Mumbanda wakatili hadi yaaka 12 wakeñeleña nindi amuuki. Wenjilili kunyima yaYesu mwizaza dawantu nawa wakwatili kwishina dachakuvwala chindi chahewulu. Hohenohu, wakoleli. Chamukwatiliyi, Yesu wehwili nindi: “Hinyi wunankwati?” Iwu mumbanda watiyili woma, ilaña wenjili nakumuleja nindi yena diyi wunamukwati. Yesu wamukundejeli nakumuleja nindi: ‘Mwanami yaña mukuwunda.’

Nlomboli wejina daJayirusa wamulembeleli Yesu nindi: ‘Tuyi kwitala dami! Mwanami wanyanya wamumbanda wakata nankashi.’ Ilaña henohu Yesu kanda ashiki kwitala daJayirusa, iwu kansi wamumbanda wafwili. Yesu chashikiliyi, wamweni antu amavulu anenzi nakudilila hamu nanichi chisaka. Yesu wayilejeli nindi: ‘Bayi mudilaku; nakaami hohu.’ Kuhiñahu wamukwatili iwu kansi kuchikasa nakumwila nindi: “Eyi kansi, hindukaku!” Hohenohu washakamini nawa Yesu walejeli anvwali jindi nindi amwinki yakuda. Toñojokaku muzañalu watiyiliwu anvwali jindi!