Yesu ne obiro e piny mondo oland wach maber mar Pinyruodh Nyasaye. Mondo ji ong’e gik ma Yesu biro timo e kinde mobiro bedoe Ruoth, Jehova nomiye teko mar timo honni. Yesu ne changoga tuo moro amora. Kamoro amora ma ne odhiye, joma tuo ne dhi ire, kendo ne ochangogi giduto. Wenge muofni ne yawore, joma itgi nodino koro ne nyalo winjo wach, rong’onde ne wuotho maber, kendo joma ne nigi jochiende bende ne ogolnegi jochiendego. Jomoko ne nyalo mulo kata mana lawe kende, to gichango achanga. Ji mathoth ne luwo Yesu kuonde duto ma ne odhiye. Kata mana sama ne odwaro ni obed kar kende, pod norwakoga joma ne dhiga ire. Ne ok oriembo ng’ato ang’ata.

Chieng’ moro ka ne Yesu ni e ot moro, ji ne okelone ng’at moro ma tuo ma ne ok nyal wuotho. Kata kamano, ji ne opong’o odno thich ma ne onge kaka ne inyalo so jatuono e ot. Kuom mano, ne gitucho wi tado mi gilorogo ng’atno nyaka piny ir Yesu. Kae to Yesu nonyiso jatuono kama: ‘Chung’ malo iwuothi.’ Ng’atno nochung’ mowuotho, kendo ji nowuoro wachno ahinya.

Chieng’ moro machielo, ka Yesu ne donjo e gweng’ moro, jodhoho moko apar ma ne ochung’ gi kuma bor matin nokok kama: ‘Yesu, konywae yawa.’ E ndalono, joma ne nigi dhoho ne ok oyienegi sudo machiegni gi joma ne onge gi tuono. Yesu ne onyiso jodhohogo mondo gidhi e hekalu. Ka luwore gi Chik Jehova, jadhoho ne onego odhi e hekalu bang’ ka  osechango. Ka ne gin e yo ka gichomo hekalu, ne gichango. Ka ne achiel kuomgi ofwenyo ni osechango, nodok ir Yesu mogoyone erokamano, kendo nopako Nyasaye. Kuom ji apar ma ne nigi dhoho, ng’at achielno kende e ma nodok goyo erokamano.

Dhako moro ma ne osetuore kuom higni 12 ne gombo chango ahinya. Chieng’ moro ka ne Yesu ni e dier oganda, dhakono noluro mos mi omulo nanga Yesu. Nochango kanyo gi kanyo! Ka ne mano otimore, Yesu ne openjo kama: ‘En ng’a ma omula?’ Luoro ne omako miyono, kata kamano, ne ofulore. Yesu nohoye kama: ‘Nyarwa, dhi gi kue.’

Jatelo moro ma nyinge Jairo bende nosayo Yesu kama: ‘Bi e oda! Nyara matin tuo marach.’ To ka Yesu pok nochopo e od Jairo, nyakono ne otho. Ka Yesu nochopo, ne oyudo ji mang’eny ma nobiro ywago nyathino. Yesu nonyisogi kama: ‘Weuru ywak; nyakoni nindo aninda.’ Kae to nomako lwet nyakono, mi owacho kama: ‘Nyathiwa, a malo!’ Ka ne Yesu otieko atieka wacho wechego ni i, nyakono nochier, kendo Yesu nonyiso jonyuolne mondo omiye chiemo. Nyaka bed ni jonyuolgo ne mor ndi, donge?