Ko Jesus myiiny yä naxwiiny, yëˈë ojts tkäjpxwaˈkxyë oybyë ayuk diˈib nyimaytyakypy ja Diosë yˈAnaˈam Kyutujkën. Jyobaa nan mooyë mëjääw parë ttunëdë miläägrë ets parë dyajnigëxëˈëgët ti tyunaampy ko nety yˈaneˈemy. Extëm nˈokpëjtakëm, Jesus mbäädë nety dyaˈˈagëdaˈagyë jäˈäy oy ti päˈäm tmëdatët. Oytyim määjëty ja päˈäm jäˈäy yˈanmääyë parë dyaˈˈagëdäˈägët, ets ta dyaˈˈagëdaky. Extëm ja wiints yaˈijxëˈk, ja nat yajmëdoowëˈk etsë jäˈäy diˈib të xyujxtääynyë yajˈyoˈoyëˈk. Ets tëgok, jantsy jeˈeyë wyitpäˈä yajtoony, ta ja jäˈäy yˈagëdaky. Nan yˈëxkajxë kaˈoybyëty. Ja jäˈäy oytyim määjëty ojts pyanëjkxyëty, ets oy naytyuˈuk jyayajpäädany, tsuj yajxon ojts tˈagëˈë tˈaxäjë oytyim pënëty.

Tëgok, ta yajmëmiiny tuˈugë jäˈäy diˈibë nety të xyujxnë mä Jesus yajpääty. Per kom jantsy nimayë nety jap, kyaj mbäät tmëdëjkëdë ja päˈäm jäˈäy, pääty tkukëëytyuttë ja tëjk parë tkutëëynyäjxtë mä netyë Jesus yajpääty. Ta netë Jesus tˈanmääy ja päˈäm jäˈäy: “Pëdëˈëk ets yoˈoy”. Ko ojts yoˈoytsyoony, ta ja jäˈäyëty duˈunyë ojts wyëˈëmëdë.

Tëgok, tamë netyë Jesus tyim jäˈtanë mä tuˈugë käjpn, ko nimäjkë yetyëjk diˈib myëdäjttëbë leprë ojts myëgäjpxëdë desde jagam: “¡Jesus pudëjkëdëgëts!”. Mä tadë tiempë, pënaty myëdäjtypyë leprë kyaj ijty mbäät pën tmëwingony. Nanduˈun ijty ja Diosë Lyey jyënaˈany ko pënaty myëdäjttëbë leprë, jaanëm nyëjkxtët mä ja templë ko nety të yˈagëdäˈäktë. Päätyë Jesus kyajxëdë mä ja templë ets mientrës tyuˈuyoˈoytyë, ta yˈagëdaktë. Ets ko niduˈugë  tyäˈädë jäˈäy tˈijxy ko të yˈagëdaˈaky, ta jyëmbijty parë tmoˈoyaˈanyë dyoskujuyëmë Jesus ets tmëjkumayaˈanyë Dios. Mä tyäˈädë nimäjkpë yetyëjk, jeˈeyë tuˈuk diˈib yäjkë dyoskujuyëm.

Nan tamë nety tuˈugë toxytyëjk diˈib mäjmajtsk jëmëjt kujk pyëjkënë ets jantsy agëdäˈägäämbë nety mët ko nëgoo yˈayoownë. Pääty tyëjkë mayjyaˈayoty parë tmëwingonäˈänyë Jesus ets ttonanë ja wyitpäˈä, jantsy jeˈeyë ojts ttoonë, ta yˈagëdaky. Ta Jesus dyajtëëy: “¿Pënëts të xytyony?”. Ja toxytyëjk jantsy tsëˈkë, per ta ojts tninëjkxyë Jesus ets ttukmëtmaytyaktääy. Jesus ta jyotkujkmooyë ets yˈanmääyë: “Uˈunk jaˈa, nëjkx agujk jotkujk”.

Tuˈugë yajkutujkpë diˈib xëwˈäjt Jairo, mëktaˈaky tˈanmääyë Jesus: “Jam mätsë ndëjk. Yëˈko nnëëxuˈungëts mëk jam pyekyëty”. Per mä netyë Jesus kyajäˈtynyëm mä ja Jairo tyëjk, ta yˈoˈky ja kixyuˈunk. Ko Jesus jam jyajty, tamë netyë mayjyaˈay jyëˈëy yäˈäxtë. Jesus ta yˈanmääyëdë: “Këdii mjëˈëy myäˈäxtë, määp jeˈeyë”. Ta net ja kixyuˈunk tkëˈëmëmäjtsë ets tˈanmääy: “Kixyuˈunk, ¡pëdëˈëk!”. Ta ja kixyuˈunk netyë pyëdëˈky, ta netë Jesus tˈanmääy ja uˈunktääk uˈunkteety: “Yajkaytyë tyäˈädë uˈunk”. ¡Okwinmay wiˈix nyayjäˈäwëdë ja tääk teety!