Jesus ear itok ñan lal̦ in bwe en kwal̦o̦k nuuj eo em̦m̦an kõn Aelõñ eo an Anij. Bareinwõt Jeova ear lel̦o̦k ñane jetõb kwõjarjar eo an bwe en kõm̦m̦an menin bwilõñ ko me renaaj kaalikkar ta ko Jesus enaaj kõm̦m̦ani ñe enaaj Kiiñ. Kõn men in, ear maroñ kõmour ro renañinmej. Jabdewõt jikin ear etal ie l̦o̦k, armej ro renañinmej rar kepaake im kajjitõk jipañ jãn e, im ear kõmour er aolep. Ro repilo rar maroñ lol̦o̦kjen̦, ro rejarroñroñ rar maroñ roñ, ro rar jaje m̦akũtkũt rar maroñ etetal, im ro me jetõb ko rettoon rar del̦o̦ñ ñan ippãer Jesus ear kadiwõjl̦o̦k er. Joñan, ke armej ro rar jibwe tõrerein nuknuk eo an, rar kajju mour jãn nañinmej ko aer. Bareinwõt meñe ewõr iien Jesus ear kõn̦aan makel̦o̦k iaan, ak ear jab kõjekdo̦o̦n armej ro rar itok ñan ippãn.

Ilo kar juon iien, jet armej rar bõktok juon em̦m̦aan ejaje m̦akũtkũt ñan m̦weo Jesus ear pãd ie. Ak ekar lukkuun obrak m̦weo kõn armej im rar jab maroñ del̦o̦ñ. Kõn men in, rar rupe ioon m̦weo bwe ren maroñ doorlal̦l̦o̦k em̦m̦aan eo ñan ippãn Jesus. Innem Jesus ear ba ñan em̦m̦aan eo: ‘Jerkak im etetal.’ Ke ear jerkak im etetal, armej ro rar lukkuun bwilõñ.

Ilo bar juon iien, ke Jesus ear etal ñan juon bukwõn, 10 em̦m̦aan ro me rar bõk nañinmej in lõba rar jutak ettol̦o̦k im lam̦õjl̦o̦k ñane im ba: ‘Jesus, kwõn jipañ kõm!’ Ilo kar tõre ko, emo an ro rej bõk nañinmej in lõba kepaake jabdewõt armej. Innem Jesus ear ba ñan em̦m̦aan ro bwe ren etal ñan tampel̦ eo ãinwõt an kar Kien eo an Jeova kakien ro relõba ñan kõm̦m̦ane ãlikin aer mour jãn nañinmej eo aer. Ilo ial̦ eo aer l̦o̦k, rar mour jãn nañinmej in aer. Ke juon iaan l̦õm̦aro ear kile bwe ejako an lõba, ear jepl̦aak bwe en kam̦m̦oolole Jesus im  ear nõbar Anij. Iaan aolep l̦õm̦aro 10, e wõt ear jepl̦aakl̦o̦k bwe en kam̦m̦oolole Jesus.

Bareinwõt ear wõr juon kõrã me eto an nañinmej ium̦win 12 iiõ im ear lukkuun kõn̦aan mour jãn nañinmej in an. Ear etal likinl̦o̦k Jesus ibul̦õn armej ro im jibwe itõrerein wõt nuknuk eo an. Ilo iien eo wõt, ear kajju mour jãn nañinmej eo an. Ak kiiõ Jesus ear kajjitõk: “Wõn ear jibwe nuknuk e aõ?” Ekkar ñan juon iaan kien ko an Jeova, kõrã in en kar jab pãd epaake armej ro, eñin unin ear kor im mijak. Jekdo̦o̦n ak ear jãdel̦o̦k im kwal̦o̦k m̦ool ñane bwe e eo ear jibwe tõrerein nuknuk eo an. Jesus ear kaenõm̦m̦ane ilo an kar ba ñane: ‘Nejũ, ilo̦k ilo aenõm̦m̦an.’

Ear wõr juon rũlale im̦õn kabuñ an RiJu ro etan Sairõs me ear akwel̦ap ippãn Jesus im ba: ‘Jouj im itok ñan m̦ween̦ im̦õ! Ledik en̦ nejũ elukkuun nañinmej.’ Ak m̦okta jãn an kar Jesus tõparl̦o̦k m̦weo, em̦õj an ledik eo mej. Ke Jesus ear tõpar m̦weo, ear lo an elõñ armej bũrom̦õjtok ippãn baam̦le eo. Jesus ear ba ñan er: ‘Kom̦win jab jañ bwe ej kiki.’ Innem ear jibwe pein ledik eo im ba: “Nejũ, kwõn jerkak!” Ledik eo ear kajju jerkak, im Jesus ear ba ñan jinen im jemãn bwe ren lel̦o̦k kijen. Baj l̦õmn̦ak m̦õk kõn kar eñjake eo an jinen im jemãn ledik in?