A Zeezi waa tẽngã zug n na n moon Wẽnnaam Rĩungã koe-noogo. A Zeova kõ-a-la vʋʋsem sõngã t’a maan yel-soalma, n wilg a sẽn na n maane, a sã n wa lebg Rĩma. A sãooga bãas buud fãa. A sẽn kẽngẽ fãa, bãad-rãmb ra wata a nengẽ n kot sõngre, la a sãoog-b lame. A ra pukda zoensã nini, n kɩtdẽ tɩ wʋmsã tõe n wʋme, tɩ põyã tõe n kẽne. Zĩn sã n da tar ned me, a rigda zĩnã. Nebã sã n da sɩɩs a fuugã noor bala, b paamda laafɩ. A sẽn kẽngẽ fãa, nebã ra tũud-a lame. A Zeezi mi n dat n zĩnda a yembre, tɩ nebã ket n watẽ. Baa ne rẽ a sõngd-b lame.

Vugri, a Zeezi ra zĩi roog pʋgẽ tɩ nebã yaa wʋsgo. Neb n tʋk bãad sẽn pa tõe n kẽn n wa. Roogã sẽn da pidã yĩnga, b ra pa tõe n kẽ ye. B rʋʋ roogã zug n maan võore, n tũ be n sik rao wã a Zeezi taoore. A Zeezi yeela rao wã yaa: ‘Yik n kẽne.’ A sɩd yikame n kẽne, tɩ nebã yɛɛs wʋsgo.

Daar a ye, a Zeezi ra kẽeda tẽn-bil a ye pʋgẽ, tɩ wãoob piig be yɩɩg n kelemd yaa: ‘Zeezi, sõng-do!’ Bãmb wakatẽ wã, ned sã n da yaa wãoore, a pa segd n pẽneg neb a taabã ye. A Zeezi yeel-b lame tɩ b kẽng wẽnd-doogẽ wã, n tɩ maan bũmb ning a Zeova tõogã sẽn yeel tɩ b maane, ned sẽn yaa wãoor sã n paam laafɩ. B sẽn wa n debdã, b fãa paama laafɩ. La wãoor a  ye n lebg n wa pʋʋsa a Zeezi barka, la a pẽg Wẽnnaam. Yẽ a ye bal n lebg n wa.

Pag n da bẽed na maan yʋʋm 12. A maana a sẽn tõe fãa n na n paam laafɩ. Neb kʋʋng n da pʋgd a Zeezi, la pagã wẽdga nebã n kolg a Zeezi n sɩɩs a fuugã noore. Zĩig pʋgẽ, a paama laafɩ. La a Zeezi sokame: “Yaa ãnda n sɩɩs maamã?” Rabeem yõka pagã, la a waa a Zeezi taoore, n togs-a fãa. A Zeezi bels-a lame, n yeel-a yaa: ‘M biiga, kẽng ne laafɩ.’

Karen-doog kãsem a ye yʋʋr sẽn boond t’a Zayiruus n wa n yeel a Zeezi yaa: ‘M bõos tɩ f wa mam zakẽ wã, tɩ m bi-puglã yĩns zabda wʋsgo.’ A Zeezi sẽn wa n na n ta zakẽ tɩ biigã kiime. A yãame tɩ neb wʋsg wa n naaga zakã rãmb tɩ b yãbda. A Zeezi yeel-b lame: ‘Da yãb-y tɩ biigã gõeeme.’ Rẽ poore, a gãda biigã nug n yeel yaa: ‘Biiga yiki.’ Zĩig pʋgẽ biigã yikame n zĩndi, la a Zeezi yeela a roagdbã tɩ b bao rɩɩb n kõ-a. Tags n ges a roagdbã sũur sẽn yɩ noog to-to.