Yesu uezile ha mavu mu ku ambulula muzimbu ua cili ua Vuangana vua Njambi. Linga a muese via ka linga Yesu omo a ka pua Muangana, Yehova ua mu hanene sipilitu santu a linge vikomoueso. Ua hasele ku saka nkala vuvezi. Kuose kua ile vakua ku vavala va mu kavele a ka va kuase, kaha ua va kanguisile vose. Tupuputa va putukile ku mona, tusindamatuitui va putukile ku ivua, vilema va hasele ku enda kaha vaze va kele na vandemone va va tundisilevo. Ambe vaze va kuatele lika ku ntsongo ya vuzalo vueni, va kangukile. Vantu va kele na ku kava Yesu kuose kua ile. Ambe mua tondele ku kala lika lieni, kasi ka sekuile muntu na umo uahi.

Tangua limo, vamo vantu va nehele umo cilema ku ndzivo ya kele Yesu. Vunoni mu ndzivo mua sulile cikuma vantu, kaha ka va uanene kua ku kovelela. Ngeci va zambuluile helu lia ndzivo linga va koveleseleho cilema uaco. Kaha Yesu ua mu lekele ngueni: ‘Katuka, kaha enda!’ Mua putukile kuenda vantu va komokele.

Ntsimbu ikuavo, omo Yesu ua kovelele mu limo limbo, vamala likumi vakua mbumba va manene ku laako na ku tambakana nguavo: ‘Yesu, tu kuase!’ Ku matangua aze, vakua mbumba ka va va tavesele ku suena ku vakuavo vantu. Yesu ua lekele vaze vamala va ye ku tembele, ngue mu lia muesele Lisiko lia Yehova ku tuala ha vakua mbumba nga va na kanguka. Mu va kele na ku yako va kangukilile mu njila. Umo mukua mbumba ha kati kavo, mua muene  ngecize na kanguka ua hilukile kuli Yesu mu ku mu santsela na ku zumbangeya Njambi. Ha kati ka vose likumi, ou ikeye lika ua santselele Yesu.

Umo mpuevo ua vavalele miaka 12 ua tondele cikuma ku mu saka. Ngeci ua kavele mbunga mu nima, na ku kuata ku ntsongo ya vuzalo vua Yesu. Kaha ua kangukile mu ntsimbu ize vene. Mu nima yaco, Yesu ua hulile, ngueni: ‘Iya na nji kuata?’ Uze mpuevo ua vuile vuoma vua kama, vutuhu ngoco uezile ku lutue lua vose na ku handeka vusunga. Yesu ua mu lembeziekele, ngueni: ‘Munange, ya mu ciyulo.’

Umo mukuluntu ua sinangonga ua lizina Njailu ua lambelele Yesu ngueni: ‘Tu ye ku ndzivo yange! Munange ua mpuevo ali na ku vavala cikuma.’ Vunoni tele Yesu kanda a hete, kanike uaco ua tsile. Mua ka hetele, Yesu ua uanene vantu vavengi vezile ku ku-tsa ca kanike. Kaha Yesu ua va lekele ngueni: ‘Kati mu lile; ku kosa lika na kosa.’ Kaha ua kuatele kanike ku livoko na ku handeka, ngueni: ‘Ove kanike, hinduka!’ Ha ntsimbu ize vene ua hindukile, kaha Yesu ua lekele visemi veni linga va mu hane via-ku-lia. Aci singanieke ndzolela i va vuile visemi veni!