Jesús ualajki kimoyauako nopa kuali tlamachtili tlen toTeotsij iTlanauatijkayo. Jehová kimakak itonal, kiampa ueliskia kichiuas uejueyi tlamantli uan kinextiskia tlen kichiuas kema tlanauatis. Jesús ueliyaya kinchikaua nochi katli mokokouayayaj. Kampa Jesús yauiyaya, katli mokokouayayaj kiiljuiyayaj ma kinchikaua uan nochi kinchikauayaya. Katli amo tlachiayayaj, tlachixkej, katli amo tlakakiyayaj, tlakajkej, katli amo ueliyayaj nejnemij, nejnenkej uan kinkixtiliyaya maseualmej amo kuali ajakamej. Maske san kiitskiyayaj itenuaxo iyoyo, mochikauayayaj. Maseualmej kampa ueli kitokilijtiauiyayaj, uan maske kemantika kinekiyaya itstos iselti, ya nochi kuali kinseliyaya.

Se tonali, kiuikakej se tlakatl kampa Jesús itstoya, nopa tlakatl amo ueliyaya mojmolinia. Itstoyaj miakej maseualmej, yeka tlejkokej kalpani, tlakoyonijkej uan nopaya kitemouijkej. Uajka Jesús kiiljuik nopa tlakatl: “Ximeua uan xia”. Kema pejki nejnemi, nopa maseualmej mosentlachilijkej.

Seyok tonali, kema Jesús asitiauiyaya ipan se altepetl, matlaktli tlakamej katli kipixtoyaj lepra chikauak kiiljuijkej: “¡Jesús, xitechchikaua!”. Ipan nopa tonali, katli kipixtoyaj lepra amo ueliyayaj kinnechkauiaj sekinok. Uan nopa Tlanauatili kiijtouayaya kema mochikauaskiaj, kinamikiyaya monextitij ipan teokali. Yeka Jesús kintitlanki ma yakaj kampa teokali. Kema yauiyayaj, nochi mochikajkej. Se  tlen inijuantij tlakuepilik kampa Jesús itstoya uan kitlaskamatilik uan kiueyichijki toTeotsij. Tlen nopa matlaktli tlakamej, san setsi kitlaskamatilik Jesús.

Se siuatl kipixtoya 12 xiuitl mokokouayaya uan kinekiyaya mochikauas pampa tlauel tlaijiyouiyaya. Yeka maske itstoyaj miakej, monechkauik Jesús iika uan kiitskilik itenuaxo iyoyo, ¡uan nimantsi mochikajki! Uajka Jesús kiijtok: “¿Ajkia nechitskik?”. Maske nopa siuatl momajmatik, kinechkauik uan kiiljuik kenke kiitskilik iyoyo. Jesús kiyolchikajki uan kiiljuik: “Aui, xia ika pakilistli”.

Se tekichijketl katli motokaxtiyaya Jairo miakpa kiiljuik Jesús: “Xiuala nochaj. Nosiuapil tlauel mokokoua”. Kema Jesús ayamo onasiyaya Jairo ichaj, nopa siuapil mijki. Kema asito, Jesús kinitak miakej mochokilijtoyaj ininuaya Jairo ichampoyouaj. Jesús kiniljuik: “Amo xichokakaj, san kochtok”. Uajka kimaitskik nopa siuapil uan kiiljuik: “¡Siuapil, ximeua!”. Nopa siuapil nimantsi mejki, uan Jesús kiniljuik itatauaj ma kitlamakakaj. ¡Ximoiljui kenijkatsa tlauel yolpajkej itatauaj!