Jesús ualaj nikan taltikpak kiteixmatiltiko tatiochiualismej tein kiualkuis iTekiuajyo Dios. Uan no, Jiova kimakak yektikatsin espíritu tein kipaleuij maj kichiua uejueyi tachiualismej uan ika kinextij tein kichiuas keman yeski Tekiuaj. Kemej neskayot, Jesús uelia kipajtiaya akin yeski. Kampa yeski yaya, akin mokokouayaj kitajtaniayaj maj kinpaleui, uan yejua nochin kinpajtiaya. Kinpajtij akin amo tachiayaj, akin amo takakiaj uan akin amo ueliaj nejnemiaj. Pajtiaj maski sayoj kimatokayaj itaken. Jesús no kinkixtiaya amokuali ejekamej. Kampa yeski yaya Jesús taltikpakneminij kitojtokayaj, uan yejua amo keman kiixtopeuak aksa, nion ijkuak kinekia iselti yetos.

Se tonal, kiualkuikej se takat akin amo uelia nejnemia itech kali kampa yetoya Jesús. Sayoj ke kemej tel miakej moajsiaj, amo uelik kalakkej, yejua ika tatapojkej kalkuako uan ompakauin kitemoltijkej hasta kampa yetoya Jesús. Ompa, Jesús kiluij takat: “Ximeua uan xinejnemi”. Keman peuak nejnemi, taltikpakneminij semi kimoujkaitakej.

Okse tonal, Jesús ajsitiyaya se xolal, uan 10 takamej akin kipiayaj lepra kiuejkatsajtsilijkej: “¡Jesús, xitechpaleui!”. Itech nejon tonalmej, akin kipiayaj lepra amo ueliaj motokiayaj iniuan okseki taltikpakneminij. Uan no, iTanauatil Jiova kijtouaya ke monekia yaskej templo satepan ke pajtiaj. Yejua ika Jesús kiniluij maj yanij ompa. Keman yajtoyaj templo, pajtikej. Keman semej  kiitak ke pajtik, mokepak uan kitasojkamatilij Jesús uan kiueyichiuak Dios. Maski katkaj 10 takamej, sayoj se kitasojkamatilij Jesús.

Se siuatsin 12 xiujmejya mokokouaya uan kinekia pajtis porin amo taxikouayaok. Yejua ika panotiyajki kampa yajtoyaj miakej hasta ajsik kampa Jesús uan kimatokak itilmaj. Siuatsin niman pajtik. Ompa, Jesús tajtanik: “¿Akoni nechmatokak?”. Siuatsin semi mouia, sayoj ke motokij uan kitapouij nochi. Jesús kiyolseuij uan kiluij: “Nokonetsin, xiyouj ika yolseuilis”.

Se taixyekankej akin monotsaya Jairo kitataujtij Jesús: “Xiuiki nochan. Nosiuapiltsin motelkokoua”. Sayoj ke achto ke ajsiskia ichan Jairo, siuapiltsin momikilij. Keman ajsik, Jesús kinitak miakej chokatoyaj iniuan ichankauan siuapiltsin. Yejua kiniluij: “Amo xichokakan, yejua sayoj kochtok”. Ompa, kimakitskij uan kiluij: “Siuapiltsin, ¡ximeua!”. Yejua niman meuak, uan Jesús kiniluij itatuan maj kitamakanij. ¡Ximonemili keniuj momachilijkej itatuan!