Jesu wakavia pa nyika kuti acumaere masoko akanaka o Umambo hwa Mwari. Kuti atatije vandhu zvinozoitwa ndi Jesu inga Mambo, Jehovha wakamupekeja mujimu mucena kuti akwanise kuita zvishamaiso. Iyena waikwanisa kurapa ndhendha yese. Kwese kwaaienda, vandhu vaihwaja vaiviya kwaari kuti vabeswe zve iyena waivarapa. Jesu wairapa mapofu, vacikazwi vaizwa, vacikafambi vaifamba zve waikwanisa kuponesa vaya vaineswa ngo madhimoni. Vamweni vaikwanisa kurapika ngo kupsasa pura-pura yake. Jesu waiteverehwa ngo vandhu kwese kwaienda. Jesu aacairegera kubesera vandhu, pikija pa nguva yaida kugara ega.

Njiku imweni, vandhu vakaviisa mwanarume acikakwanisi kufamba pa nyumba yaigara Jesu. Asi avazivi kukwanisa kunghwina ngo kuwanda ko vandhu mu nyumbemo. Ngokudaro vakaita bovo padenga zve vobzukisa mwanarumewo kuna Jesu. Perapo Jesu wakati ku mwanarume: ‘Mukai ufambe.’ Paakamuka wofamba, vandhu vakakahamara maningi.

Pa nguva imweni, Jesu paaienda ku mutundhu umweni, wakavona vanarume vaikwana kuita 10 vainga no mapere, ivona vakamimira ngo ndhambo veciti: ‘Jesu, tibesevo!’ Mu mukuvowo, vandhu vainga no mapere avacaitendehwa kuguma phedo no vandhu vamweni. Jesu wakavabvunja kuti vaende ku temberi inga zvainangwa ngo mutemo wa Jehovha ko vaya vainga no mapere. Pavainga mu gwanja, vakarapika. Umwe wavo paakavona kuti wainga warapika, wakahwirira kobonga  Jesu zve wakakuja Mwari. Pa vandhu vainga 10, umwe basi ndiyena wakaviya kobonga Jesu.

Umwe mwanakaji waihwaja ku makore anokwana 12, waida maningi kuraphwa. Iyena wakaviya ngo sure kwa Jesu zve wakabata nguvo yake. Ngokukasika wakarapika. Pazvakaitika, Jesu wakabvunjisa kuti: “Ndiani wapsasa nguvo jangu?” Mwanakaji wakatanga kuthya, asi wakaviya pamberi pa Jesu konanga cokwadi. Jesu wakamuembejera ngo kunanga kuti: ‘Mwana, endai ngo kunyarara.’

Umwe mukuru wo sinagoga waidanwa Jairosi wakakumbira Jesu kuti: ‘Vianyi kanyi kwangu! Cimwana cangu ciri kuhwaja.’ Asi cimusikane cakafa Jesu acikato aguma kumuzi kwa Jairosi. Jesu paakaguma, iyena wakavona vandhu vakawanda vaiviya kookhuza mbhuri ya Jairosi. Jesu wavakabvunja kuti: ‘Mucarira, musikane aazivi kufa, wakavata.’ Perapo wakabata nyara yo cimusikane zve wakati: “Musikane, ndinokubvunja, mukai.” Musikane wakagara pasi ngokukasika zve Jesu wakabvunja vabari vake kuti vamupe cokuha. Rangarirai kuti vabari vake vakajizwa kudini!