Möi Yesu ba gulidanö ba wanuriaigö turia somuso dödö sanandrösa ba Wamatörö Lowalangi. Ibeʼe khönia Yehowa geheha niʼamoniʼö ba wamalua tandra sahöli-höli dödö. Omasi Yehowa wangoromaʼö hadia nifalua Yesu dania na tobali ia Razo. Fefu wökhö tola ifadöhö Yesu. Gofu hezo möi ia, laʼondrasi ia niha sofökhö ba ifadöhö ira. Teboka hörö niha sauʼa, safiso larongo li niha, tola mofanö niha sombuyu-mbuyu ba teʼefaʼö niha si göna malaʼika si lö sökhi. Döhö ira fefu hewaʼae ha lagogohe gahe mbaru Yesu. Laʼoʼö ia niha sato gofu hezo möi ia. Me hatö samösa Yesu, lö irai ifofanö niha sangandrö tolo khönia.

Samuza maʼökhö, laʼohe ndra matua sombuyu-mbuyu töla ba nahia si toröi Yesu. Hizaʼi, ato sibai niha ba daʼö irege tebai möi ira bakha. Börö daʼö, latölaʼö zagö nomo, aefa daʼö ladada si tou ndra matua andrö. Imane Yesu khö ndra matua daʼö, ’Ozizio ba owawaö.’ Ahöli-höli dödö niha me mozizio ba mofanö ndra matua daʼö.

Ba ginötö tanö böʼö, möi Yesu ba zi sambua banua ba so dafulu ndra matua si göna bo auri muʼao-ao ira moroi ba zaröu, ’He Yesu, tolo ndraʼaga!’ Me luo daʼö, niha si göna bo auri tebai lafahatö ira ba niha sato. Ifatenge ira Yesu ba gosali. Moloʼö Oroisa Yehowa daʼö zinangea ifalua niha si göna bo auri na no döhö ia. Ba dalu lala, döhö ndra matua si dafulu andrö. Samösa moroi ba gotaluara iʼila wa no döhö ia, mangawuli ia furi ba wangandrö saohagölö khö  Yesu ba isuno Lowalangi. Moroi ba gotalua ndra matua si dafulu andrö, ha yaʼia zangandrö saohagölö.

Samösa ndra alawe si no göna fökhö 12 fakhe waʼara ba omasi ia döhö. Me luo daʼö, ba gotalua niha sato so Yesu. Ihatöʼö ia ira alawe daʼö moroi furi ba igogohe gahe mbaru Yesu. Iʼanemaiʼö döhö ia. Aefa daʼö isofu Yesu, ”Haniha zombambaya yaʼo?” Ataʼu sibai ndra alawe daʼö. Hizaʼi ifahatö ia khö Yesu ba ifatunö hadia zalua khönia. Imane khönia Yesu, ’He onogu, böi aombö dödöu. No döhö ndraʼugö.’

Samösa zondröniaʼö ba nahia waʼowulo sotöi Yaʼiro iʼandrö khö Yesu, ’Aeʼe ba nomogu! Abölö-bölö wökhö nonogu alawe.’ Hizaʼi, fatua lö ofeta Yesu ba nomo Yaʼiro, no mate nono daʼö. Me irugi, iʼila niha sato oi zara mege-ege. Imane khöra Yesu, ’Böi miʼeʼe, ha si mörö nono daʼa.’ Aefa daʼö igogohe danga nono andrö Yesu ba imane, ”Faoso onogu!” Iʼanemaiʼö maoso nono andrö. Iwaʼö Yesu khö zatuania enaʼö labeʼe gönia. Tatu omuso dödö zatuania!