Jesu o be a tlile lefaseng go tlo bolela ditaba tše dibotse tša Mmušo wa Modimo. E le gore Jehofa a re bontšhe seo Jesu a tlago go re direla sona nakong e tlago ge e tla be e le kgoši, o ile a nea Jesu matla a go dira mehlolo. Jesu o be a kgona go fodiša malwetši ka moka. Kae le kae mo a bego a eya gona, balwetši ba be ba etla go yena gomme a ba fodiša ka moka. O be a dira gore difofu di bone, difoa di kwe, digole di sepele e bile a ntšha batemona bathong. Le gona le ge batho ba be ba kgwatha seaparo sa gagwe, ba be ba fola. Batho ba be ba latela Jesu kae le kae mo a bego a eya gona. Le ge ka dinako tše dingwe Jesu a be a nyaka go ba nnoši, ba be ba no mo latela. O be a sa ba rake.

Ka letšatši le lengwe ge Jesu a be a le ntlong e nngwe, batho ba ile ba tliša monna yo a sa kgonego go sepela go yena. Ba ile ba se kgone go tsena ka ntlong yeo ka ge go be go tletše batho. Ka gona ba thula [goba ba phula] lešoba tlhakeng ya ntlo yeo gomme ba theošetša monna yoo go Jesu. Ke moka Jesu a re go monna yoo: ‘Emelela o sepele.’ Ge monna yoo a sepela, batho ba ile ba makala.

Lebakeng le lengwe ge Jesu a tsena motseng o mongwe, banna ba lesome bao mebele ya bona e bego e bola, ba ile ba goelela ba re: ‘Jesu re thuše!’ Mehleng ya Jesu, batho ba mohuta woo ba be ba sa swanela go ba kgauswi le batho ba bangwe. Jesu o ile a botša banna bao gore ba ye tempeleng. Lebaka ke gore Molao wa Jehofa o be o re ge motho a fodile bolwetši bjoo, a ye tempeleng. Eupša ge banna bao ba sa le tseleng ya go ya tempeleng, ba ile ba  fola. Ge yo mongwe wa banna bao a bona gore o fodile, o ile a boela go Jesu go yo mo leboga gomme a tumiša Modimo. Go banna bao ba lesome, ke o tee feela yo a ilego a leboga Jesu.

Go be go na le mosadi yo mongwe yo a bego a na le mengwaga e 12 a babja, gomme a nyaka go fola. Ka letšatši le lengwe ge Jesu a be a kgobokanetšwe ke lešaba, mosadi yoo o ile a tla ka morago ga Jesu gomme a fihla a kgwatha seaparo sa gagwe. Gateetee, a fola. Ge seo se direga, Jesu a botšiša a re: ‘Ke mang yo a nkgwathilego?’ Mosadi yoo o be a tšhogile, eupša a ya go Jesu gomme a mmotša nnete. Jesu a mo homotša a re: ‘Morwedi wa ka, sepela ka khutšo.’

Ka morago ga moo, molaodi yo mongwe wa Sinagoge yo a bego a bitšwa Jairo o ile a kgopela Jesu a re: ‘Etla ntlong ya ka! Morwedi wa ka yo monyenyane o babja kudu.’ Eupša pele Jesu a ka fihla ntlong ya Jairo, ngwanenyana yoo o ile a hwa. Ge Jesu a fihla, o ile a bona batho ba bantši bao ba bego ba tlile go tlo lla le lapa la gabo ngwanenyana yoo. A re go bona: ‘Le se ke la lla; ngwanenyana yo o robetše.’ Ke moka a swara seatla sa ngwanenyana yoo a re: ‘Ngwanenyana, ke re go wena tsoga!’ Gateetee ngwanenyana yoo a tsoga bahung, gomme Jesu a botša batswadi ba gagwe gore ba mo fe sa go ja. Nagana gore batswadi ba gagwe ba ile ba ikwa bjang!