Jesus éí God biNahatʼaʼ baa haneʼ yáʼátʼéehii baa hozhdoolnih biniyé nihokáaʼjįʼ jiníyá. Naatʼáanii jizlı̨́įʼgo miracles ájíłʼı̨́į doo biniyé Jiihóvah biníłchʼi diyinii haidiníʼą́. Ąąh dahazʼą́ ałʼąą ádaatʼéii náyííłdzííʼ. Tʼáá tázhdíghááhgóó bąąh dah nahazʼánígíí níjííłdzííʼ. Doo daʼooʼínígíí daʼooʼı̨́, bijédaahkałígíí daʼdiitsʼaʼ, bitsʼíís doo nidahaʼnánígíí nidaakai, dóó demons baa nídaatʼínígíí yíká eelwod. Azhą́ Jesus biʼééʼ tʼóó yidadeeshchid ndi, nídáádzííʼ. Jesus tádíghááhgóó diné bikééʼ tádadikááh. Háádeeshyįh jinízin ndi, Jesus éí doo łaʼ nílááh yidííniid da.

Łah Jesus hootah jizdáagi tʼóó ahayóí áłah jílı̨́, áko doo yah ahóótʼiʼ da. Hooghan bikááʼdę́ę́ʼ ąą ádayiilaago, diné bitah doo nahwiiʼnáa da léiʼ haa deistı̨́. Jesus díí diné ííłní: ‘Nídiidáahgo dah diiná.’ Dashdiiyáago, áłah nilínę́ę tʼóó bił adahóóyóí.

Náánáłahgo éí Jesus kin sinilgi jiníyáago, hastóí neezná yiltʼéego leprosy bee bąąh dah nahazʼánígíí tʼáá nízaadę́ę́ʼ dadilwosh: ‘Jesus, nihíká anilyeed!’ Íídą́ą́ʼ leprosy bee hąąh dah hazʼą́ągo doo diné bitahgóó nijigháa da ńtʼééʼ. Bee hazʼáanii bikʼehgo Jesus éí templegóó dohkááh hodííniid. Ákǫ́ǫ́ jookahgo nídajoodzííʼ. Leper łaʼ tʼą́ą́ʼ nádzáago Jesus yichʼįʼ ahééh niizı̨́ı̨́ʼ áádóó God yaa haznih. Tʼááłáʼí tʼéiyá ahééh jiniizı̨́ı̨́ʼ.

 Asdzání léiʼ bąąh dah hazʼą́ągo 12 nááhai, áko náádideeshdááł nízin. Áłah jílı̨́įgi díí asdzání éí Jesus bineʼdę́ę́ʼ nizhníyáago biʼééʼ bizhdeelchid. Tʼáá ákǫ́ǫ́ nídzoodzííʼ. Jesus ání: ‘Háísh shideelchid?’ Asdzání náldzid ndi, Jesus yichʼįʼ niníyáago hazhóʼó ádaa hoolneʼ. Asdzání yaa joozbaʼgo ííłní: ‘Shitsiʼ, nił hashtʼehodítʼéego náádááł.’

Synagogue bee bóhólníihii Jéíʼiras éí Jesus náyookąąhgo ání: ‘Shighandi díínááł! Shitsiʼ yéigo bitah honeezgai.’ Jesus tʼahdoo Jéíʼiras bighandi jíghááhgóó atʼééd daaztsą́. Jéíʼiras bighandi jiniyáago Jesus éí diné daachago jiiłtsą́. Jesus áháłní: ‘Tʼáadoo daahchaaí, atʼééd tʼóó ałhosh.’ Atʼééd bílaʼ yiyiiłtsoodgo ání: ‘Awééʼ, nídiidááh!’ Tʼáá ákǫ́ǫ́ nízhdiiʼnaʼ áádóó hazhéʼé dóó hamá ííłní: ‘Baʼnołtsóód.’ Hazhéʼé dóó hamá tʼáá íiyisíí bił hóózhǫǫd!