Yesu akaija omu nsi kubuurira amakuru marungi g’Obukama bwa Ruhanga. Yesu kubaasa kworeka ebi araije kukora nk’Omugabe, Yehova akamuha omwoyo gurikwera kukora eby’okutangaaza. Akaba naabaasa kutamba endwara zoona. Abantu abarwaire bakaba baza ahu Yesu yaabaire aza hoona ngu abahwere, kandi akaba abatambira. Empumi zikaba zireeba, abafiire amatu bahurira, abazingazingirwe bagyenda, n’abaabaire bariho baadaimoni baaba gye. N’obu baabaire bakwata aha mukugiro gw’ekijwaro kye, bakaba bakira. Abantu bakakuratira Yesu ahu yaabaire aza hoona. N’obu Yesu yaabaire aba naayenda kuba wenka, akaba atabinga bantu.

Eizooba rimwe, abantu bakareeta omushaija owaabaire azingazingirwe omu nju ahu Yesu yaabaire naatuura. Kwonka enju ekaba erimu abantu baingi batarikubaasa kutaahamu. N’ahabw’ekyo bakafumura aha mutwe gw’enju baamushuumya ahu Yesu yaabaire ari. Bwanyima Yesu akagambira ogwo mushaija ati: ‘Imuka ogyende.’ Ku yaakozire ekyo, abantu bakatangaara.

Aha murundi ogundi, Yesu ku yaagiire omu kyaro kimwe, ababembe ikumi abaabaire beemereire hangahari bakeeta n’eiraka rihango bati: ‘Yesu, tuhwere.’ Omu bunaku obwo, abantu abaabaire baba barwaire ebibembe bakaba batarikwikirizibwa kwirira haihi n’abandi. Yesu akagambira abashaija abo kuza omu hekalu, nk’oku Ebiragiro bya Yehova byabaire nibiragiira ababembe kukora baaheza kukira. Ku baabaire bakiri omu muhanda, bakira. Omubembe omwe ku  yaamanyire ngu yaakira, akagaruka kusiima Yesu n’okuhimbisa Ruhanga. Ahari ikumi, omwe wenka niwe yaasiimire Yesu.

Omukazi owaabaire arwaire kumara emyaka 12 buzima akaba naayenda ngu akire. Akaija enyima ya Yesu omu bantu baingi kandi yaakora aha mukugiro gw’ekijwaro kya Yesu. Ahonaaho, akakira. Ekyo ku kyabaireho, Yesu akabuuza ati: “N’oha owaakora aha kijwaro kyangye?” Omukazi akatiina munonga, kwonka akaija ahari Yesu yaagamba amazima. Yesu akamuhuumuriza naagira ati: ‘Mwana wangye, yegyendere n’obusingye.’

Omukuru wa sinagogi orikwetwa Yairo akeeshengyereza Yesu ati: ‘Ija owangye! Muhara wangye arwaire munonga.’ Yesu ku yaabaire atakahikire owa Yairo, omwishiki akafa. Yesu ku yaahikireyo, akareeba abantu baingi abaabaire baizire kuganya n’eka egyo. Yesu akabagira ati: ‘Mutarira; agwejegyeire.’ Bwanyima akakwata omukono gw’omwishiki kandi yaagira ati; “Mwishiki ’we, imuka.” Ahonaaho akaimuka, kandi Yesu yaagambira abazaire be ngu bamuhe eky’okurya. Teekateeka aha kushemererwa oku abazaire be baagizire!