Gyisɛse rale azɛlɛ ye azo kɛ ɔbabɔ Nyamenle Belemgbunlililɛ ne anwo edwɛkpa ne nolo. Amaa menli anwu mɔɔ Gyisɛse bayɛ kɛ Belemgbunli la, Gyihova maanle ye sunsum nwuanzanwuanza kɛ ɔva ɔyɛ nwanwane ninyɛne. Ɛnee ɔkola ɔyɛ ewule biala ayile. Ɛleka biala mɔɔ ɔkɛhɔ la, wuliravolɛma ba ye ɛkɛ, na ɔyɛ bɛ muala ayile. Ɛnee anyezinliravolɛma nwu debie, anzodiliravolɛma te edwɛkɛ, menli mɔɔ ɛbubu la kola tia yɛɛ bɛdabɛ mɔɔ bɛwɔ sunsum ɛtane tumi bo la anwo dɔle bɛ. Saa bɛfa bɛ sa bɛka ye tɛladeɛ ne anloa bɔbɔ a, bɛte kpɔkɛ. Ɛleka biala mɔɔ Gyisɛse hɔle la bɛdoale ye. Saa Gyisɛse kpondɛ kɛ ɔdie ɔ menle na awie ba ɔ nwo ɛkɛ ne bɔbɔ a, ɔnvoa ye.

Mekɛ bie, bɛvale nrenyia bie mɔɔ ɛbubu la bɛhɔle sua bie mɔɔ ɛnee Gyisɛse wɔ nu la anu. Noko ɛnee menli dɔɔnwo wɔ ɛkɛ, ɔti bɛangola bɛanwolo sua ne anu. Yemɔti bɛpɛle tokule wɔ sua ne ati zo na bɛdwulale nrenyia ne wɔ Gyisɛse anwo ɛkɛ. Gyisɛse zele nrenyia ne kɛ: ‘Dwazo na tia.’ Mɔɔ ɔdwazole ɔdiale la, ɔzinle menli ne anwo.

Mekɛ bieko mɔɔ ɛnee Gyisɛse ɛlɛkɔ namule bie azo la, mrenyia bulu mɔɔ bɛle kokobɛvolɛma la gyinlanle moamoa na bɛdeanle nu kɛ: ‘Gyisɛse, boa yɛ!’ Zɔhane mekɛ ne, ɛnee bɛmmaa kokobɛvolɛma ɛmbikye menli. Kɛmɔ Gyihova Mɛla ne kile kɛ saa kokobɛvolɛma te kpɔkɛ a ɔwɔ kɛ bɛkɔ ɛzonlenlɛ sua ne anu la ati, Gyisɛse hanle kɛ bɛhɔ ɛkɛ. Mɔɔ bɛlɛkɔ la, bɛdele kpɔkɛ. Mɔɔ kokobɛvolɛma ne anu ko nwunle kɛ yede kpɔkɛ la,  ɔziale ɔ nzi ɔrayɛle Gyisɛse mo na ɔyele Nyamenle ayɛlɛ. Menli bulu ne anu ko ala a yɛle Gyisɛse mo a.

Ɛnee raalɛ bie mɔɔ anwo ɛdo ye ɛvolɛ 12 la anye ɛbolo ɛlɛkpondɛ ayileyɛlɛ. Ɔlile Gyisɛse anzi wɔ menli ne anu na ɔvale ɔ sa ɔhanle ye tɛladeɛ aguzo ne anloa. Ɛkɛ ne ala, ɔdele kpɔkɛ. Mɔɔ ɔrale ye zɔ la, Gyisɛse bizale kɛ: “Nwane a vale ɔ sa hanle me a?” Raalɛ ne ahonle dule, noko ɔhɔle ɔ nwo ɛkɛ na ɔhanle nɔhalɛ ne ɔhilele ye. Gyisɛse kyekyele ɔ rɛle na ɔhanle kɛ: ‘Me ra raalɛ, fa anzodwolɛ kɔ.’

Kpanyinli bie mɔɔ bɛfɛlɛ ye Gyeeyaelɛse la zɛlɛle Gyisɛse kɛ: ‘Bɛla me sua nu! Me ra raalɛ ekyi ne ɛnde kpɔkɛ fee.’ Noko Gyisɛse kadwu Gyeeyaelɛse sua nu ɛkɛ ne la, ɛnee kakula raalɛ ne ɛwu. Mɔɔ Gyisɛse dwule ɛkɛ ne la, ɔnwunle kɛ menli dɔɔnwo ɛra ɛkɛ na bɛlɛsu. Gyisɛse zele bɛ kɛ: ‘Bɛmmasu, ɔlɛdafe ala.’ Akee ɔzɔle kakula raalɛ ne asa na ɔhanle kɛ: “Kakula raalɛ, mese, dwazo!” Ɛkɛ ne ala ɔdwazole, na Gyisɛse hanle hilele ye awovolɛ kɛ bɛmaa ye debie ɔli. Wɔmɔ nea kɛzi ye awovolɛ anye liele la!