Jesus kjeem no de Ieed om de goode Norecht von Gott sien Kjennichrikj bekaunttomoaken. Toom wiesen, waut Jesus aus Kjennich doonen wudd, jeef Jehova am dän heiljen Jeist toom Wunda doonen. Jesus kunn jieda Krankheit heelen. Wuaemma hee wia, kjeemen de Kranke no Help, un hee heeld dee aula. De Blinje kunnen seenen, de Doowe kunnen hieren, de Jelämde kunnen gonen un dee, waut von beese Jeista jekjwält worden, worden frie. Wan dee uk bloos dän Raunt von Jesus siene Kjleeda aunschieeden, worden dee jeheelt. De Menschen kjeemen Jesus aulawäajen hinjaraun. Jesus schekjt dee kjeenmol wajch, nich mol wan hee wull auleen sennen.

Eemol brochten se eenen Jelämden no daut Hus, wua Jesus wia. Oba doa wieren soo väl Menschen, daut dee doa nich nenkunnen. Dan muaken dee een Loch derch daut Dak un leeten dän jelämden Maun rauf no Jesus. Jesus säd to dän Jelämden: “Sto opp un go.” Aus dee dan oppstunt, wieren de Menschen sea vewundat.

Een aundatsmol aus Jesus en een Darp nenkjeem, wieren doa tieen leprakranke Mana. Dee brelden von wiet auf: “Jesus, halp ons!” To dee Tiet kunnen Leprakranke nich dicht bie aundre Menschen komen. Jesus säd, de Mana sullen nom Tempel gonen, soo aus Leprakranke no Jehova sien Jesaz no musten, wan dee ieescht jesunt wieren. Hinjawäajes worden dee dan jeheelt. Aus eena von dee enwort, daut hee jesunt wia,  kjeem hee trigj no Jesus un bedankt sikj un lowd Gott. Dit wia de eensja von de tieen, waut sikj kjeem bedanken.

Eene Fru wia aul 12 Joa krank jewast un wull sea jieren jesunt woaren. See kjeem von hinjen manke Menschen no Jesus un schieed dän Raunt von sienen Äwarock aun. Fuaz wia see jesunt. Dan fruach Jesus: “Wäa schieed mie aun?” De Fru haud Angst, oba see kjeem no Jesus un säd dän de reine Woarheit. Jesus treest dee un säd: “Dochta, go en Fräd.”

Een Leida, waut Jairus heet, prachad Jesus un säd: “Komm no ons! Miene kjliene Dochta es sea krank.” Oba ea Jesus bat Jairus sien Hus wia, storf de Mejal. Aus Jesus doa aunkjeem, sach hee, daut een deel Menschen jekomen wieren un met de Famielje toop truaden. Jesus säd to dee: “Roat nich. Dee schlapt bloos.” Dan neem hee de Mejal äare Haunt un säd: “Kjint, sto opp!” Dee recht sikj fuaz opp un Jesus säd to äare Elren, see sullen ar waut to äten jäwen. Kaust du die denkjen, woo de Elren daut nu jinkj?