Jesusqa kay jallpʼaman jamorqa Diospa Gobiernonmanta sumaj willaykunata willaj. Jehová Diosqa payman atiyta qorqa milagrosta ruwananpaj. Ajinamantataj rey kashaspa imatachus ruwananta rikucherqa. Payqa supayniyoj runasta, ciegosta, lojtʼitusta, suchu runasta, waj laya onqoyniyoj runastawan sanoyacherqa. Maymanchá rerqa, chaypi onqosqas sanoyachinanta mañakoj kanku, paytaj sanoyachej. Runasqa Jesuspa ropanpa kantunta llankharispa sanoyapoj kanku. Runasqa Jesuswan khuska purej kanku. Payqa sapallan kayta munaspapis runas payman rejtinku uyarej.

Uj kuti, Jesús kasharqa chay wasiman uj suchu runata apamorqanku. Runa juntʼa kasqanraykutaj mana apaykuyta aterqankuchu. Chayrayku wasej techonta juskʼuspa chay suchu runata Jesusman uraykucherqanku. Jesustaj payta nerqa: “Sayarispa puririy”, nispa. Chayta rikojkunataj mayta tʼukorqanku.

Waj día, Jesús uj ranchoman qayllaykushajtin, lepra onqoyniyoj 10 runas payta nerqanku: “Jesús, yanapariwayku ari”, nispa. Chay tiempopeqa lepra onqoyniyoj runas, mana runasman chimpanankuchu karqa. Jesusqa chay 10 runasta temploman rinankuta nerqa, Diospa Leynin nisqanman jina. Chay runastaj temploman rishaspa sanoyaporqanku. Ujnenqa sanoyapuytawan Jesusman  agradecekoj kuterqa, Diostataj jatuncharqa. Chay 10 runasmantaqa ujnillan Jesusman agradecekorqa.

Uj warmeqa 12 watastaña onqosqa kasharqa, sanoyapuytataj munarqa. Chayrayku runaspa chaupinman yaykuspa Jesuspa ropanpa kantitullanta llankharerqa. Chay ratopachataj sanoyaporqa. Chantá Jesús nerqa: “¿Pitaj ropayta llankhaykuwanri?”, nispa. Chay warmitaj mancharisqa payman qayllaykuspa tukuy imata willakorqa. Jesustaj sonqocharqa: “Wawáy, sonqo tiyaykusqa ripuy”, nispa.

Kamachej Jairoqa Jesusmanta rogakorqa: “Imillitay may onqosqa kashan. Wasiyman jamuriy ari”, nispa. Jesús niraj chayashajtintaj imillitaqa wañuporqa. Jesusqa Jairoj wasinman chayaspa rikorqa runasta, Jairoj familianta ima waqashajta. Chayrayku nerqa: “Ama waqaychejchu, imillitaqa puñushallan”, nispa. Chantá imillitaj makinta japʼispa nerqa: “Imillita, sayariy”, nispa. Imillitataj chay ratopacha sayarerqa. Jesustaj imillitaj tatasninman nerqa mikhunata jaywanankuta. Imillitaj tatasnenqa maytachá kusikorqanku.