Jesusca Dios churashca Mandanamanta huillanamanmi cai allpaman shamurca. Shinallataj Diospaj espirituta chasquishpami milagrocunata rurarca. Chashnami pai mandacushpa chaillatataj ruranata ricuchirca. Por ejemplo, tucui laya ungüitami Jesusca jambi pudirca. Maiman rijpipish ungushcacuna jambihuai nijpica tucuicunatami jambirca. Chaimi ciegocuna, sordocuna, mana cuyurijcunapish alliyarcacuna. Jesuspaj churana filota japirishpallami alliyai tucurcacuna. Jesusca demoniocunatapish llujshichircami. Maipica paillami casha nirca. Pero gentecunaca tucui ladomanmi paita catijcuna carca. Chashna jahuapish Jesusca tucuicunatami alli chasquirca.

Shuj punllaca mana cuyurij runatami Jesuspajman apamurcacuna. Pero gentecuna junda cashcamantami mana maita yaicui tucurcacuna. Chaimantami huasi cꞌatata anchuchishpa ungushcata uriyachircacuna. Chaipimi Jesusca ungushcataca, ‘jatari puri’ nirca. Pai puri callarijpica gentecunaca achcatami mancharircacuna.

Shujtaj punllaca uchilla puebloman Jesús chayacujpimi lepra ungüihuan caj 10 runacunaca carumanta, ‘Jesús ayudahuai’ nishpa caparircacuna. Chai tiempopica Diospaj leypica lepra ungüita charijcunaca shujtajcunapajmanca mana cꞌuchuyanachu carca. Shinallataj alliyashca qꞌuipami Diospaj huasiman yaicuna carca. Jesusca chai 10 runacunataca Diospaj huasiman richij nijpimi rircacuna. Shinapish manaraj chayashpami alliyarcacuna. 10 runacunamantaca  shujllami alliyashca cashcata ricushpa Yaya Diosta jatunyachingapaj, Jesusta pagui ningapajpish tigramurca.

Chashnallataj 12 huatacunata ancha ungushca shuj huarmimi, achca llaquita apacushcamanta jambirinata munarca. Chaimi gentecunapaj chaupita rishpa Jesuspaj churana filopi japirishpalla chai rato alliyarca. Jesusca, ‘¿pitaj ñuca churanapi japirirca?’ nircami. Chai huarmica manchaihuan cꞌuchuyashpami tucuita huillarca. Chaita uyashpaca Jesusca, ‘huahua ama manchaichu, sumajta causagrilla’ nircami.

Sinagogapi pushaj Jairo shuti runapish shamushpami Jesustaca, ‘ñuca ushushimi ñalla huañugrin, ñuca huasiman shamupai’ nirca. Pero Jesús manaraj chayajpimi huambraca ña huañurca. Ña chayajpica familiacunapish amigocunapishmi huacacurcacuna. Chaita ricushpami Jesusca, ‘ama huacaichijchu huambraca dormicunllami’ nirca. Qꞌuipaca huambrapaj maquita japishpami, ‘huambra, ¡jatari nini!’ nijpi jatarirca. Chai qꞌuipaca yaya mamataca ‘huambraman micunata caraichij’ nircami. Paicunaca achcatami cushicushcacuna canga ¿nachu?