Jesusqa Diospa munaychakuyninmanta willakunanpaqmi kay pachamanqa hamurqa. Hinaspapas Diospa atiyninwanmi demoniokunata qarqurqa. Mana uyariqkunata, ñawsakunata hinaspa suchukunatapas allinyachirqam. Wakinkuqa Jesuspa pachanta llapchaykuspallam sanoyarurqaku, chayraykum runakunaqa maymanña riptinpas qatiqku. Jesusqa llapankutamá chaskiq sapallanña kayta munaspanpas. Tukuy chaykuna ruwasqanwanmi Jesusqa qawachirqa kay pachata kamachimuspan imakuna ruwananmanta.

Huk kutipim Jesuspa kasqan wasiman suchu runata aparurqaku. Ichaqa achkallaña runakuna kasqanraykum Jesusman asuykachiyta mana atirqakuchu, chaymi wasipa hawantaña uraykachirqaku. Jesusñataqmi chay suchu runata allinyarachirqa. Hinaptinmi runakunaqa qawarayarqaku.

Huk kutipipas leprawan unquq 10 runakunam Jesusta qayaspanku nirqaku: “¡Jesus hampiykullawayku!”, nispa. Chay tiempopiqa leprawan unquqkunaqa manam sano runakunamanqa asuykunankuchu karqa, manataqmi Diospa wasinmanpas rinankuchu karqa. Jesusmi ichaqa nirqa Diospa wasinman rinankupaq, chaymi manaraq chayachkaspanku sanoyarurqaku. Chay 10 unquqkunamantaqa hukllam Jesustaqa agradecekurqa, hinaspam Jehova Diosta hatuncharqa.

 Huk warmipas 12 watañam llumpayta unqurqa, chaymi sanoyaruyta munaspan llapa runakunapa chawpinta asuykuspan Jesuspa pachanta llapchaykurqa, hinaspam chaylla sanoyarurqa. Jesusñataqmi nirqa: “¿Pitaq llapchaykamuwan?”, nispa. Hinaptinmi warmiqa manchakustin Jesusman asuykuspan willakurqa. Jesusñataqmi nirqa: “Mamáy amaña llakikuychu”, nispa.

Chaymantañataqmi Jairo sutiyuq runaqa Jesusta nirqa: “Warmi churillaymi llumpayta unquchkan, wasiymanyá hakuchik”, nispa. Ichaqa chayaruptinkum sipaschaqa wañurusqaña, chaymi ayllunkunapas waqachkasqaku. Paykunatam Jesus nirqa: “Ama waqaychikchu, sipaschaqa puñuyllam-puñuchkan”, nispa. Hinaspam Jesusqa sipaschapa makinta hapiykuspan nirqa: “¡Hatariyña!”, nispa. Sipaschaqa chayllam hatarirurqa. ¡Maynatachá tayta-mamanqa kusikurqaku!