Jesusqa Diospa gobiernonmanta willananpaqmi jamuran. Diosmi ichaqa santo espirituta qoran milagrokunata ruwananpaq, chaywanmi yachakuran rey kaspa imakuna ruwananta. Jesusqa atiranmi ima onqoymantapas runakunata qhaliyachiyta, chaymi onqosqakunaqa payman jamuranku, jinan llapankuta qhaliyachiran. Chaymi ñausakuna qhawaripuranku, roqt’okuna uyaripuranku, mana kuyuriqkuna puriripuranku, wakinmantataq supaykunata qarqoran. P’achanpa puntallanta llamiykuspapas qhaliyapurankun. Askhan qatikuranku, mayninpi sapallanña kayta munaran chaypas, manan jark’aranchu runakunaq jamunantaqa.

Juj kutinmi mana kuyuriq runata Jesuspa kasqanman apamuranku, ichaqa junt’an runakunaqa wasipi kasharanku. Chaymi wasiq techonta t’oqoruspanku chayninta Jesuspa kasqanman uraykachiranku. Chaymi Jesusqa chay runata niran: “Puririy”, nispa. Puririsqanta rikuspataq anchata admirakuranku.

Juj kutipitaq Jesús juj llaqtaman rishaqtin, lepra onqoyniyoq chunka runakuna karullamanta Jesusta valekuranku: “Jesús yanapaykuwayku”, nispa. Chay tiempopiqa leprayoq runakunaqa manan runakunaman qayllaykunankuchu karan. Jinaspapas Diospa leyninpi niran pipas lepra onqoymanta qhaliyaspaqa templota rinan kasqanta, chaymi Jesusqa niran templota rinankupaq. Ñanta rishaqtinkun qhaliyapuranku. Jinan  chunkantinmanta jujnillan kutirimuran Jesusta agradecekunanpaq, Diosman graciasta qonanpaqpas.

Juj warmin 12 wataña sinchita onqoran, payqa qhaliyayta munaspan Jesuspa kasqanman riran. Runakunan Jesusta muyuykusharanku chaymi payqa Jesuspa p’achanpa puntallanta llamiykuran, jinan kaqpacha qhaliyapuran. Jesustaq niran: “¿Pin llamiykamuwan?”, nispa. Warmiqa sinchitan mancharikuran, chaywanpas Jesusmanmi willakuran imachus ruwasqanta. Jinan Jesusqa warmita kallpachaykuran: “Ususiy, thajpi ripuy”, nispa.

Jairon Jesusta valekuran: “Jaku wasiyta, ususichaymi sinchi onqosqa kashan”, nispa. Ichaqa manaraq wasinman chayashaqtinkun sipaschaqa wañupuran. Jesusqa rikuranmi askha runakuna waqashasqanta. Chaymi niran: “Ama waqaychischu, sipaschaqa puñushallanmi”, nispa. Jinan sipaschata makinmanta jap’ispa niran: “¡Sayariy!”, nispa. Jinan sipaschaqa sayariranpacha, Jesustaq tayta-mamanta kamachiran mijunata qonankupaq. ¡Tayta-mamanqa anchatachá kusikuranku!