O Isus alo tele ki Phuv te propovedinel bašo e Devleskoro Carstvo. Te šaj te sikavel so ka kerel o Isus sar Cari, o Jehova dengja le sveti duh te kerel čudija. Ov šaj sine te sasljarel sa o nasvalipa. Bilo kaj te džal, ki leste avena sine nasvale manuša, hem ov sasljarela len sine. O korole šaj sine te dikhen, o kašuke te šunen, o sakatija te phiren, hem sasljarela sine okolen so sine len demonija ki lende. Čak keda pipinena sine leskere šeja, o manuša sasljona sine. O manuša džana sine palo Isus bilo kaj te džal. Čak keda mangela sine te ovel korkori, o Isus pomožinela sine e manušenge.

Jekh puti, džikote o Isus sine ko jekh kher, o manuša angje jekhe paralizirime manuše. Ama, ola našti sine te ingaren e manuše andre ko kher soske sine but gužva. Adaleske kergje dupka ko krovi te šaj adathar te mukhen le. Tegani o Isus phengja leske: „Ušti hem dža“. O manuš uštilo, hem o narodo sine vooduševimo.

Ki jekh javer prilika, džikote o Isus khuvela sine ko jekh gav, 10 manuša so sine nasvale tari lepra tergjovena sine podur lestar hem vikinena sine: „Isus, pomožin amen!“ Ko adava vreme, o leprozna manuša na smejnena sine te aven popaše uzo javera. Adale deše manušenge o Isus vakergja te džan ko hrami. Spored e Jehovaskoro zakoni, agjaar valjani sine te kerel sekoj so ka sasljol tari lepra. Ola cidingje hem, džikote panda sine ko drumo, sastile. Keda halilo kaj sastilo,  jekh taro adala deš manuša irangja pe ko Isus te blagodarinel pe leske hem te slavinel e Devle. Iako o sodeš sastile, samo jekh alo te blagodarinel pe e Isuseske.

Jekh romni so sine 12 berš nasvali, but mangela sine te sasljol. Džikote o Isus sine maškar o manuša, oj ali palaldan hem pipingja leskiri nametka. Ko isto momenti, sastili. Tegani o Isus pučlja: „Koj pipingja man?“ I romni darandili, ama ali angli leste hem vakergja leske so kergja. O Isus utešingja la hem vakergja lake: „Mi čhaj, dža hem neka ovel tut mir“.

Jekh važno manuš so vikinela pe sine Jair zamolingja e Isuse: „Molinava tut, ava ki mande! Mi čhaj tani but nasvali“. Ama, angleder o Isus te resel adari, i čhaj muli. Keda reslja anglo e Jaireskoro kher, dikhlja sar but manuša rovena e čhajake. O Isus vakergja lenge: „Ma roven — oj samo sovela“. Tegani astargja e čhaja taro vas hem vakergja: „Čhae, ušti!“ E Jaireskiri čhaj uštili odma. O Isus vakergja lakere roditelenge te den la nešto te hal. Šaj li te zamisline tuke kobor ola sine radosna?