O Isus alo telje ki phuv te propovedini ando e Devljeso Kraljevstvo. O Jehova dindža e Isusese sveti duh te čerel čudija te šaj o Isus te mothovi so ka čerel sar Kralj. Ov šajindža te sačari bilo kova nabormipe. Kuri god dželo, koro ljeste alje o naborme manuša hem ov sačardža ljen. O korore šajindže te dikhen, o kašuke te šunen, o sakatija te phiren hem ikaldža e demonen ando manuša. Čak ked pipindže oljese šeja, o manuša odmah sačilje. Kuri god dželo, o manuša dželje palo ljeste. Čak hem ked manglja te ovel kokri, o Isus niked na irindža po dumo e manušendže.

Jekh puti, dži o Isus hine ko jekh čher, o manuša andže jekhe manuše kova hine paralizovano. Ama, on naštindže te ljegaren e manuše andre ko čher sose hine but gužva. Odoljese čerdže jekh rupa ko krov te šaj odothar te mukhen lje. Tegani o Isus phendža ljese: „Ušti hem phir.“ O manuš uštindža hem o narodo hine oduševimo.

Jekh aver puti, ked o Isus khuvdža ko jekh gav, 10 manuša kola hine ljen guba terdilje podur oljestar hem vičindže: „Isuse, pomožin amen!“ Ko odova vreme, o gubava manuša na ismindže te aven popaše uzo avera. O Isus phendža odolje manušendže te džan ko hram, odoljese so premalo e Jehovaso zakon odova valjandže te čeren o gubava manuša palo odova so ka sačon. On podžindže hem dži hine pana ko drumo, sačilje. Ked haljilo so sačilo, jekh  ando odola deš manuša irindža pe ko Isus te zahvalini pe oljese hem te slavini e Devlje. Iako sačilje deš džene, samo jekh alo te zahvalini pe e Isusese.

Jekh romni so hine nabormi 12 berš, dindža sa pestar te sačol. Dži o Isus hine maškar o manuša, oj alji palo ljeste hem pipindža o krajo ando ljeso fistani. Ko isto trenutko, oj sačilji. Tegani, o Isus pučlja: „Ko pipindža man?“ I romni darandilji, ama alji anglo ljeste hem phendža ljese so čerdža. O Isus utešindža la hem phendža lače: „Mi čhaj, dža hem neka ovel tut mir.“

Jekh važno manuš, kaso nav hine Jair, zamolindža e Isuse: „Molinava tut, ava koro mande! Mi čhaj tani but nabormi.“ Ama, i čhaj mulji angljeder so o Isus reslja ko Jair. Ked reslja anglo e Jaireso čher, dikhlja sar but manuša rovena palji čhaj. O Isus phendža ljendže: „Ma roven, oj samo sovela.“ Tegani doljindža e čhaja ando vas hem phendža: „Čhaje, ušti!“ E Jairesi čhaj odmah uštilji. O Isus phendža olake roditeljendže te den la diso te hal. Šaj samo te zamisline kobor on hine bahtalje!