О Иисусо авеля пэ ԥув, кай тэ росԥэнэн лэ манушэнди и лащи весть пала лэ Дэвлэско царство. О Иегова дя лэ Иисусости пэско свынто духо, кай во тэ терэл бут чудеса. Ай инке тэ сыкавэл лэ манушэнди, со во лэла тэ терэл, кала ашэла Царёса. О Иисусо исцелияс любо насвалимос. И мануша авэнас каринг лэстэ, кай во тэ дэл зор лэнди. Ко сас коро, упалэ диқэлас, ко сас кашуко, упалэ ашунэнас, и парализованни упалэ ԥирэнас. Кадяжэ о Иисусо видаравэлас лэ бэнгэн анда мануша. Лэ манушэндар ужаластар о насвалимос даже тоди, кала вонэ кати лэнаспэ каринг лэстири йда. Пала о Иисусо ԥирэнас бут мануша. Во никала лэн на отшолас пэстар даже тоди, кала во екжэно камэлас тэ отцыёл.

Еқвар и мануша андо цэр, кай сас о Иисусо, андэ́ лэ муршэс, саво сас парализованно. Но котэ сас кадя фартэ бут мануша, кай вонэ нащи зажанас интя. Тоди вонэ стердэ яма андэ крыша и змэклэ кадэлэ муршэс ворта каринг о Иисусо. О Иисусо ԥэндя лэсти: «Ущи и жа». Тоди о мурш ущеля и ля тэ ԥирэл, и мануша фартэ динэ наздив.

Авэр разо. Кала о Иисусо авеля андэ ек гав, лэс додиқлэ дурал дэш мануша, савэндэ тернёлас и тила и вонэ зацыписайлэ: «Иисусо, поможысар амэнди!» Андэ кодэя время кацавэ манушэнди нащи сас тэ поджан пашэ каринг авэр мануша. О Иисусо ԥэндя лэнди, кай вонэ тэ жан андо храмо, важ кода кай кадя трэбуй сас тэ терэн и мануша, савэ исцелисайлэ. Кай кадя тэ терэн сас запистромэ андэ лэ Иеговаско Законо. Кала вонэ жанас каринг о храмо вонэ исцелисайлэ. Ек анда  кодэла мануша рисайля, кай тэ ԥэнэн лэ Иисусости «наис» и тэ славий лэ Дэвлэс. Анда дэш мануша, савэндэ тернёлас и тила, авеля кати ек, кай тэ ԥэнэн лэ Иисусости «наис».

Еқвар, кай сас фартэ бут мануша, каринг о Иисусо поджыля манушни, сави 12 бэрш сас насвали. Вой фартэ камэлас, кай лако насвалимос латэ тэ на авэл. Вой пашэля каринг о Иисусо, терделя палал и ляпэ каринг лэстири йда. Андэ кодэя время латар о насвалимос ужылятар. Кала када стердяпэ о Иисусо пушля: «Ко ляпэ каринг мандэ?» И манушни пэрэдарайля, но вой вижыля англэ и росԥэндя о чачимос. О Иисусо ԥэндя лати: «Щей мэрни, жа лэ лашимаса». Кадэлэстар лати ашэля фэдэр.

Ек баро мануш, савэс ақарэн Иаиро, ля тэ мангэл лэ Иисусос: «Ав андэ мэрно цэр! Мэрни щеёры фартэ насвали». Сар инке о Иисусо на авеля каринг о Иаиро и щеёры уже сас мули. Кала о Иисусо пождыля каринг о цэр, во додиқля бутэ манушэн, савэ ровэнас латирэ родоса. О Иисусо ԥэндя лэнди: «На ровэн. И щеёры совэл». Тоди во ля ла вастэстар и ԥэндя: «Щеёры ущи!» И вой ущеля. Тоди о Иисусо ԥэндя, кай тэ дэн лати тэ хан. Кати погиндосар, сар дэ ради сас латирэ родителя!