Yesuusi uullara dayinohu Maganu Mangisteha dancha duduwo duduwaraati. Yesuusi Moote ikkanno woyite assannore leellishate, Yihowa isira maalale loosanno gede qullaawa ayyaana uyinosi. Isi hursa dandiinokki dhibbi dino. Yesuusi mariwa baalawa mannu hursannonsa gede huucciˈranno; isino baalanka hursino. Ballootu laˈanno gede, macciweelootu macciishshitanno gede assino; qoleno laanshaabbinore hursino, hattono busha ayyaana fushshino. Mitu manni isinni Yesuusi uddano calla kise hurino. Mannu Yesuusi haˈriwa baala hoodesi haˈrino. Isi callisi heeˈra hasiˈranno woyite nafa, mannu isiwa daannota dihoolino.

Mitto barra mannu laanshaawino mancho Yesuusiwa abbi. Ikkollana, mannu batiˈrino daafira minira ea didandiitino. Konni daafira mineho iimiido murte hakkonne mancho Yesuusi noowa dirrissu. Hakkiinni Yesuusi mancho, ‘Kaˈe haˈri’ yiisi. Manchu kae haˈrita, hakko noo manni dhagge assiˈrino.

Wole yannarano, Yesuusi mittu qachira heeˈreenna, dhiigu amadinonsari tonnu manni xeertote heedhe, ‘Yesuusa, kaaˈlinke ballo’ yite raartu. Hatte yannara, dhiigu amadinonsari mannunniwa gamba yaa didandiitanno. Yesuusi dhiigu amadinonsari qullaawu minira hadhanno gede kulinsa; Yihowa Seeri garinni dhiigu amadinosi manchi huriro hatto assa hasiissannosi. Hadhanni heedhe xibbinsanni hurtu. Dhiigu amadinonsari giddo mittu xibbisinni hurinota  afiti, Yesuusa galataranna Magano guwisiˈrara agure higino. Tonnunku giddo Yesuusa galatinohu mitto callaho.

Mitte 12 diro dhibbu waadannase heedhino mancho xibbisenni hura lowo geeshsha hasidhino. Ise Yesuusi lowo manni ledo haˈranni heeˈreenna, badhesiinni higge dagge uddanosi qacce kissu. Hakkawoyintenni, ise xibbisenni hurtu. Hatte yannara Yesuusi, “Kisiehu ayeti?” yee xaˈmi. Mancho lowo geeshsha waajjitino; ikkirono ise albasiinni dagge assitinore kultusi. Yesuusi, ‘Beettoˈya, keerunni haˈri’ yee sheshifachishinose.

Iyairoosi yinanni roorrichi Yesuusiwa daye, ‘Qaaqqoˈya lowo geeshsha xiwantinona, miniˈyara kai ballo’ yee huucciˈri. Ikkollana, Yesuusi Iyairoosi minira iillikki qaaqqo reyitu. Yesuusi maranno woyite, lowo manni ayiddise ledo wiˈlanni no. Yesuusi insa, ‘Qaaqqo goxxella noona wiˈlitinoonte’ yii. Yesuusi qaaqqote anga amade, ‘Tee qaaqqo, gotti yii’ yiino. Bayichonko qaaqqo kaˈe ofoltu; hakkiinni Yesuusi annasenna amase, ‘Ittannore uyiyyese’ yii. Hakkawoyite qaaqqote anninna ama mageeshshi geeshsha hagiidhinoha lawannohe?