Na afio mai Iesu i le lalolagi e faalauiloa le tala lelei o le Malo o le Atua. Ina ia faailoa mai mea o le a faia e Iesu pe a avea ma Tupu, na foaʻi mai ai e Ieova iā te ia le agaga paia ina ia mafai ai ona ia faia vavega. Na mafai ona ia faamālōlō so o se maʻi. O so o se mea lava na alu i ai Iesu, na ō atu tagata mamaʻi iā te ia mo le fesoasoani, ma na ia faamālōlōina i latou uma. Na toe pupula ē tauaso, toe faalogo ē tutuli, toe savavali ē pipili, ma tuusaʻoloto i latou sa pulea e temoni. E tusa pe na o le paʻi atu lava i le pito o lona ofu, sa faamālōlōina ai lava i latou. Na mulimuli tagata i so o se mea lava na alu i ai Iesu. E oo foʻi i taimi sa manaʻo ai Iesu e iai na o ia, e na te leʻi tutuliesea tagata.

I se tasi taimi, na avatu ai e tagata i le fale o loo nofo ai Iesu se tamāloa ua pē lona tino. Ae o le toʻatele o tagata i totonu o le fale, na lē mafai ai ona latou ō i totonu. O lea na latou faapū ai le faʻalo o le fale, ma tuutuu ifo ai i lalo iā Iesu le moega o loo taoto ai le tamāloa. Ona faapea atu lea o Iesu iā te ia: ʻIa tū i luga ma savali.’ Na maofa tagata ina ua faia faapea e le tamāloa.

I le isi taimi, ina ua alu Iesu i se tasi nuu, na tutū mamao mai tamāloloa lepela e toʻasefulu ma valaau mai: ʻIesu, fesoasoani mai iā i matou.’ I na aso, e lē faatagaina tagata lepela e faalatalata atu i isi tagata. Na faatonuina e Iesu tamāloloa lepela e toʻasefulu ina ia ō i le malumalu. E pei ona faatonuina i le Tulafono a Ieova, o le mea lea e tatau ona faia e tagata lepela pe a māeʻa ona faamālōlōina i latou. A o latou agaʻi atu i le malumalu, na faamālōlōina i latou. Ina ua iloa e se tasi o lepela ua  faamālōlōina o ia, ona toe foʻi mai lea o ia iā Iesu e faafetai i ai ma viia le Atua. E mai i tamāloloa lepela e toʻasefulu, e na o le toʻatasi le tamāloa na faafetai iā Iesu.

Na iai se fafine na maua i se maʻi mo le 12 tausaga, ma na matuā naunau lava ina ia faamālōlōina o ia. Ua sau o ia i tua o Iesu faatasi ma le motu o tagata, ma paʻi atu i le pito o lona ofu tele. O le taimi lava lenā na faamālōlōina ai o ia. Ina ua tupu lenā mea, na fesili Iesu: “O ai na paʻi mai iā te aʻu?” Na fefe le fafine, ae na alu atu pea ma faamatala atu iā Iesu le mea na tupu. Na faamāfanafanaina o ia e Iesu e ala i le fai atu: ʻLoʻu afafine e, alu ia ma le filemu.’

Na talosaga atu iā Iesu se alii pule e igoa iā Iairo: ʻMaliu mai i loʻu fale. Ua matuā maʻi tigāina loʻu afafine.’ Peitaʻi, na maliu le teineitiiti a o leʻi taunuu atu Iesu i le fale o Iairo. Ina ua taunuu atu Iesu, na ia vaaia ai tagata e toʻatele o loo faavauvau faatasi ma le aiga. Na faapea atu Iesu iā i latou: ʻAua tou te fetagisi, o loo moe le teine.’ Ona tago atu lea o Iesu i le lima o le teineitiiti ma faapea atu: “Le tamaʻitaʻi e, inā tū ia i luga!” Ona tū ai lea o ia i luga, ma ua fai atu Iesu i ona mātua e avatu se meaʻai mo ia. Seʻi mafaufau i faalogona o mātua o le teineitiiti i lenā taimi!