Jesu weta emhlabeni kuze atewushumayela tindzaba letimnandzi teMbuso waNkulunkulu. Kuze avete loko Jesu latakwenta nasekayiNkhosi, Jehova wamniketa umoya longcwele kuze ente timangaliso. Abephilisa labagulako. Noma ngukuphi lapho abeya khona, bantfu labagulako bebeta kuye bacela kutsi abaphilise. Lebebangaboni emehlweni besebabona, lebebangeva etindlebeni besebeva, labachwalile besebakhona kuhamba, nalabo lebebanemadimoni besebete. Ngisho nobe bebangatsintsa nje umphetfo wengubo yaJesu bebavele baphile. Bantfu bebalandzela Jesu noma ngabe ngukuphi lapho aya khona. Ngisho nangesikhatsi Jesu afuna kuba yedvwa, abengabacoshi bantfu.

Ngalelinye lilanga bantfu baletsa indvodza lechwalile lapho Jesu abehlala khona. Kodvwa lendlini lebekunaJesu khona bekugcwele kakhulu. Bagibela etulu endlini basusa emathayela base behlisela lendvodza kuJesu. Ngako Jesu watsi kulendvodza: ‘Vuka bese uyahamba.’ Bantfu bamangala nakenta loku.

Ngalelinye lilanga Jesu nakangena kulelinye lidolobha, emadvodza lalishumi labenebulephelo ammemeta atsi: ‘Jesu, sicela usisite!’ Ngaleto tikhatsi bantfu lebebanebulephelo bebangakavunyelwa kutsi bahlale nebantfu. Jesu watsi kulamadvodza awaye ethempelini, njengobe uMtsetfo waJehova bewutsi kufanele baye nasebaphilile. Nabasendleleni baya ethempelini babese bayaphila.  Lenye yalamadvodza nayibona kutsi seyiphilile yabuyela emuva kuJesu yayobonga futsi yadvumisa Nkulunkulu. Ngiyo kuphela indvodza leyabonga Jesu.

Kunemfati lebesekuphele iminyaka lengu-12 agula futsi abefuna kuphila. Wahamba ngemuva kwesicumbi sebantfu, watsintsa umphetfo wengubo yaJesu yangetulu. Ngekushesha nje wabese uyelapheka kulokugula. Nakwenteka loku, Jesu wabuta watsi: ‘Ngubani longitsintsile?’ Lomfati wetfuka, kodvwa waya kuJesu wafike wamtjela lonkhe liciniso. Jesu wamdvudvuta ngekutsi atsi: ‘Ndvodzakati, hamba ngekuthula.’

Bekunendvodza lebekutsiwa nguJayiru leyancenga Jesu yatsi: ‘Ngicela sihambe siye endlini yami, ngobe indvodzakati yami iyagula.’ Kodvwa lomntfwana wafa ngaphambi kwekutsi Jesu afike endlini yaJayiru. Nakafika Jesu wabona bantfu labanyenti batolila. Watsi kubo: ‘Ningakhali ngobe lomntfwana ulele.’ Ngako wabamba sandla salomntfwana wase utsi: ‘Ntfombatana, vuka!’ Wavuka ngekushesha, futsi Jesu watjela batali bakhe kutsi bamnike kudla. Ucabanga kutsi batali balentfombatanyana bativa njani?