Yesus diměnta su dunia gunang měhabarẹ̌ Kararatuangu Mawu. Yehuwa něgělị rohkẹ̌ masusi si sie tadeạu i sie botonge měkoạ mukjizat. Yehuwa mapulu měnodẹ apa sarung koateng i Yesus su tempong i sie makoạ Datu. Yesus botonge mapakapia kěbị sakị. Maning saranga i sie rumal᷊eng, taumata masakị mang mědẹ̌deạ si sie, kụ i sie napakapia si sire. Taumata wuta nakasilo, taumata wengelẹ̌ nakaringihẹ̌, taumata peosẹ̌ nakaral᷊eng, dingangu taumata nipẹ̌kawasangu rohkẹ̌ dal᷊akị nipakawebasẹ̌. Piạ lai napia maning kětạeng něnenggehẹ̌ lakụ i Yesus. Taumata timol᷊e si sie maning saranga i sie rumal᷊eng. I sie lai tawe měnẹ̌nokol᷊ẹ̌ taumata apang mědẹ̌dorong tul᷊ung si sie.

Piạ su sahěllo, taumata nẹ̌bawa tau esẹ peosẹ̌ sarang bal᷊e tampạ i Yesus nẹ̌tanạ. Katewe, su tampạ ene piạ lawọ taumata, kụ i sire seng tawe makasuẹ̌. Hakị u ene , i sire němongkarẹ̌ atụu wal᷊e, bọu ene něngul᷊uhẹ̌ tau peosẹ̌ ene dingangu tandu. Yesus nẹ̌bera su esẹ ene, ’Darisịe kụ dal᷊engke.’ Su tempong esẹ ene dimarisị kụ dimal᷊eng, taumata sene sěbạe naherang.

Piạ su sahěllo, Yesus simuẹ̌ sarang sěmbaụ kampong, kụ piạ mapul᷊o esẹ masakị kusta měkẹ̌kui si sie bọu marau, ’Yesus, tul᷊ungko i kami!’ Su tempo ene taumata masakị kusta tawe wotonge mẹ̌těngkarani su taumata wal᷊inẹ. Yesus něngoro si sire pakoạ sarang bait. Tumuhụ Hukung i Yehuwa, ene harusẹ̌ koatengu taumata apang masakị kusta mạeng seng napia. Su ral᷊eng sarang bait, mapul᷊o esẹ ene  napia. Su tempong sěngkatau bọu i sire nasadarẹ̌ i sie seng napia, i sie nẹ̌bal᷊ị gunang makitarimakasẹ si Yesus dingangu mẹ̌dalo Mawu. Bọu mapul᷊o esẹ ene, kětạeng sěngkatau nakitarimakasẹ.

Sěngkatau wawine seng masakị karěngụe 12 su taunge sěbạe mapulu mapia. Su tempo ene, i Yesus ene su tal᷊oarang komol᷊angu taumata. Wawine ene riměduhẹ̌ bọu likudi Yesus kụ něnenggehẹ̌ pondol᷊u lakụe. Wawine ene apidu napia. Bọu ene i Yesus nẹ̌kiwal᷊o, ’I sai něnenggehẹ̌ si siạ?’ Wawine ene sěbạe natakụ, katewe i sie nẹ̌těngkarani si Yesus kụ nẹ̌běke apa seng nariadi. Yesus nẹ̌bera si sie, ’Anạku, abe ghěnggang. I kau seng napia.’

Sěngkatau těmbonangu wal᷊eng pěngangibadang arenge Yairus nẹ̌dorong si Yesus, ’Děntako su wal᷊eku! Anạku wawine masakị mawěha.’ Katewe su tempong bědang tawe nahumpạ su wal᷊eng i Yairus, anạ ene nate. Su tempong nahumpạ, i Yesus nakasilo lawọ taumata sụsangị. Yesus nẹ̌bera si sire, ’Abe sangị, anạ ini kětạeng nẹ̌tikị.’ Bọu ene, Yesus něněngal᷊ẹ̌ limang anạ ene kụ nẹ̌bera, ”Wawụ pẹ̌bangungke!” Anạ ene apidu nẹ̌bangung. Yesus něngoro su matimade gunang pěgělị kaěng si sie. Matimade tantu sěbạe mal᷊uasẹ̌!