Niavy an-tane etoy ty Jesosy mba hagnambara ty talily soa i Fanjakàn’Andrianagnaharey. Nimea i Jehovah fagnahy masigne reke mba hanao fahagagagne, hanoroagne ty raha hatao’e naho fa mpanjaka. Nisitragne’e iaby ze marare nimbama’e mbeo. Nahatrea ty goa, naharey ty karegnegne, nandeha ty kepeke sady nisitragne ze niazo ty demonia. Ndra ty sisy i lamba’ey avao naho nikasihe iareo, le nahasitragne. Norihe o ndatio avao ty Jesosy. Ndra tie te hitofa reke, le tsy nasiake naho fa nisy ndaty nimbama’e mbeo.

Nisy lahilahy maleme nandese o ndaty tamy ty tragno nisy i Jesosy, tie indraike. Faie nifeno ndaty i tragnoy, le tsy nisy ty ho niziliha iareo. Hafara’e nagnafaha iareo i tafo-tragnoy, le nazotso iareo boakeo i mararey mba hositragne i Jesosy. Hoe ty Jesosy tamy i mararey: ‘Mitsangàna rehe, le mandehana.’ Nigaga o ndatio naho fa nisitragne reke.

Nandeha tamy ty tanàgne raike ka ty Jesosy tie indraike. Nisy boka folo lahy ty tao. Le hoe iareo tamy i Jesosy: ‘Ampeo zahay!’ Tsy nahazo niharine o ndatio o bokao ty tamy izay. Nampandehane i Jesosy ho amy tempolỳ agne iareo, fa izay ty Lalà i Jehovah hoahy ze ndaty boka sitragne. Naho fa nimbeo iareo, le nisitragne tan-dalagney. Naho fa nitrea ty raike amy i bokay tie nisitragne reke, le niheregne nisaotse i Jesosy reke sady nidera  i Jehovah. Ty raike tamy i boka folo rey avao ty nahay nisaotse i Jesosy.

Nikivy ka ty ampela raike narare mafe tagnate ty 12 taogne. Nitrea’e tagnate i vahoakey ao ty Jesosy, le norihe’e. Nisitragne i arete’ey naho fa nikasike ty rambo i akanjo i Jesosỳ reke. Hoe ty Jesosy: ‘Ia nikasike ahio?’ Natahotse i ampelay, le rineha’e tamy i Jesosy ty maregne. Hoe ty Jesosy tama’e: ‘O anake, lonike mba hositragne vata’e rehe.’

Nisy manam-boninahitse raike atao tihoe Jairo nangatake i Jesosy tie: ‘Miavia an-tragnoko agne fa marare mafe ty anak’ampelako.’ Mbe tsy niavy agne ty Jesosy, le fa nimate i ajajay. Nahatrea ndaty maro nitagny ty Jesosy naho fa niavy ao. Hoe ty Jesosy tamy iareo: ‘Ko mitagny nareo, fa miroro avao reke.’ Rinambe’e tamy i tagna’ey i ajajay, le hoe reke: ‘O ene, mifohaza rehe!’ Nifoha i ajajay, le nampagnomeze i Jesosy hanegne aze ty rene’e.’ Nifale o rae aman-drene’e reo tamy izay!