Naʻe haʻu ʻa Sīsū ki he māmaní ke tala ʻa e ongoongo lelei ʻo e Puleʻanga ʻo e ʻOtuá. Ke fakahaaʻi ʻa e meʻa ʻe fai ʻe Sīsū ʻi heʻene Tuʻí, naʻe ʻoange ʻe Sihova kiate ia ʻa e laumālie māʻoniʻoní ke ne fai ha ngaahi mana. Naʻe lava ke ne fakamoʻui ha faʻahinga puke pē. ʻI ha feituʻu pē naʻá ne ʻalu ki ai, naʻe omi kiate ia ʻa e kakai naʻe puké ki ha tokoni, pea naʻá ne fakamoʻui kotoa kinautolu. Naʻe lava ke sio ʻa e kuí, fanongo ʻa e tulí, lue ʻa e kakai naʻe heké, pea naʻe fakatauʻatāinaʻi ʻa e faʻahinga naʻe puleʻi ʻe he fanga tēmenioó. Naʻe aʻu ʻo nau moʻui kapau naʻa nau ala pē ki he tapa ʻo hono kofú. Naʻe muimui ʻa e kakaí ʻia Sīsū ʻi ha feituʻu pē naʻá ne ʻalu ki ai. Naʻa mo e taimi naʻá ne loto ai ke nofo toko tahá, naʻe ʻikai ʻaupito te ne tuli ha taha pē naʻe haʻu kiate ia.

ʻI he taimi ʻe taha, naʻe ʻomi ai ʻe he kakaí ha tangata heke ki ha fale ʻa ia naʻe nofo ai ʻa Sīsū. Ka naʻe fuʻu fonu ʻa e falé ʻo ʻikai lava ke nau hū ki loto. Ko ia naʻa nau fakaava ʻa e ʻató ʻo tukutuku hifo ai ʻa e tangatá kia Sīsū. Naʻe tala ange leva ʻe Sīsū ki he tangatá: ‘Tuʻu hake ʻo ʻalu.’ ʻI heʻene tuʻu haké, naʻe ʻohovale ʻa e kakaí.

ʻI ha toe taimi ʻe taha, lolotonga ʻa e hū atu ʻa Sīsū ki ha kolo, naʻe tuʻu mai mei he mamaʻó ʻa e kau tangata kilia ʻe toko hongofulu ʻo nau kaila: ‘Sīsū, tokoniʻi kimautolu!’ ʻI he ngaahi ʻaho ko iá, naʻe ʻikai ngofua ke haʻu ʻa e kau kiliá ʻo ofi ki he kakaí. Naʻe tala ange ʻe Sīsū ki he kau tangatá ke nau ō ki he temipalé, hangē ko e meʻa naʻe tala ʻi he Lao ʻa Sihová kuo pau ke fai ʻe he kau kiliá hili ʻenau saí. ʻI heʻenau fononga atu ki aí, naʻa nau sai. ʻI he  ʻiloʻi ʻe he taha ʻo e kau kiliá kuo fakamoʻui iá, naʻá ne foki ʻo fakamālō kia Sīsū mo fakahīkihikiʻi ʻa e ʻOtuá. ʻI he toko hongofulú, ko e toko taha pē ko ení naʻá ne fakamālō kia Sīsuú.

Ko ha fefine ʻa ia naʻe puke ʻi he taʻu ʻe 12 naʻá ne feinga lahi ke ne moʻui. Naʻá ne haʻu ʻi he tuʻa ʻo Sīsuú ʻi he fuʻu kakaí ʻo ne ala ki he tapa ʻo hono kofu tuʻá. Naʻá ne sai ʻi he taimi pē ko iá. ʻI he hoko iá, naʻe ʻeke ʻe Sīsū: “Ko hai naʻe ala mai kiate aú?” Naʻe ilifia ʻa e fefiné, ka naʻá ne haʻu ki muʻa ʻo tala ange ʻa e moʻoní kiate ia. Naʻe fakafiemālieʻi ia ʻe Sīsū ʻaki ʻene pehē: ‘ʻOfefine, ʻalu ʻi he fiemālie.’

Naʻe kole ha ʻōfisa ko Siailosi kia Sīsū: ‘Haʻu ki hoku falé! ʻOku puke lahi ʻa hoku kiʻi ʻofefiné.’ Ka ki muʻa ke aʻu ʻa Sīsū ki he fale ʻo Siailosí, naʻe mate ʻa e taʻahiné. ʻI he aʻu atu ʻa Sīsuú, naʻá ne sio naʻe haʻu ʻa e kakai tokolahi ko e fiekaungāmamahi mo e fāmilí. Naʻe tala ange ʻe Sīsū: ‘ʻOua te mou tangi; ʻokú ne mohe pē.’ Naʻá ne puke leva ʻa e nima ʻo e taʻahiné peá ne pehē: “Taʻahine, tuʻu hake!” Naʻá ne tangutu hake ʻi he taimi pē ko iá, pea naʻe tala ange ʻe Sīsū ki heʻene ongo mātuʻá ke ʻoange ha meʻa ke ne kai. Fakakaukau atu ki he ongoʻi naʻe maʻu ʻe heʻene ongo mātuʻá!