Jesu i tile laha misaveni kasi ku ta chumayela mahungu yo saseka ya Mufumo wa Nungungulu. Kasi ku komba lezvi Jesu a to maha a cikhati leci a to fuma, Jehovha i no mu nyika moya wa ku basa kasi a maha zvihlamaliso. Jesu i wa zvi kota ku hanyisa vanhu va nga hi ni mababyi wontlhe. Kontlhe lomu a ngaya kona, ku wata vanhu vo babya va ta kombela ku hanyisiwa, a se va hanyisa. Lava va nga kala va nga woni va wa hanyisiwa va sangula ku wona, lava va kufa tindleve va sangula ku ingisa, a zvilema zvi sangula ku famba, lava va nga xanisiwa hi madhimoni, ma hlongoliwa va hanya. Ni loku munhu a khumba laha magumo ka nguwo yakwe basi i wo hanyisiwa mababyi yakwe. A vanhu va wa landzelela Jesu kontlhe lomu a ngaya kona. Hambu loku a lava ku tshama yece, a vanhu va wo mu landza.

Ka khati go kari, a vanhu va no tlakula wanuna a nga womile zviro vaya naye ka yindlu leyi Jesu a nga hi ka yona. Kanilezvi, ku wa tele nguvhu hi vanhu laha ka kuza lava va nga hi ni loyi a nga kari a babya va tsandzeka ku nghena. Hikwalaho, va no bhoxa le hehla ka yindlu, va releta wanuna loye laha ka Jesu. Jesu i no byela wanuna loye wa ku babya, aku: ‘Suka u yima, u famba’. A cikhati leci a nga suka a famba, a vanhu va no hlamala nguvhu.

Ka khati gin’wani kambe Jesu na a nghena ka cidhoropana co kari, i no woniwa hi 10 wa vavanuna va nga kari va babya hi hlokonho, zvonake va nyima hi le kule va banguleka vaku: ‘Jesu, hi kombela ku hi vhuna’! Masikwini lawo, lava va nga babya hi hlokonho va wa nga faneli ku tshinela kusuhani ni van’wani. Jesu i no byela vavanuna lavo lezvaku vaya tempeleni, kota lezvi a Nayo wa Jehovha wu nga wula lezvaku loku munhu a hanyisilwe hlokonho i fanele kuya tempeleni.  Laha va nga kari va famba, va no hanyisiwa. A cikhati leci a mun’we wabye a nga zvi wona lezvaku i hanyisilwe, i no wuya ka Jesu a ta mu bonga nguvhu a tlhela a dzundza Nungungulu. Ka vontlhe lava va 10 , mun’we basi a nga wuya a ta bonga Jesu.

A wasati wo kari a nga mbhetile 12 wa malembe na a babya, i wa fambafamba kontlhe a lava ku hanyiswa. I no nyanimela hi lomu cikari ka vanhu zvonake a ya khoma choka ya nguwo ya Jesu. I no tekela ku hanyiswa. Loku lezvo zvi mahekile, Jesu i no wutisa aku: ‘Hi mani a nga ndzi khumba’? A wasati loye i no chava nguvhu; kanilezvi i tshinele ka Jesu a wula lisine. Jesu i no mu chavelela hi ku mu byela lezvi: ‘N’wananga, famba hi ku rula’.

A wanuna wa ku hi Jayiro, a nga hi murangeli wa lomu a vaJudha va nga khozela kona, i no khongotela Jesu aku: ‘A hi fambe kaya ka mina! A nhanyana wa mina wa babya nguvhu’. Kanilezvi, Jesu na a nga se chikela kaya ka Jayiro, a nhanyana loye i nofa. Loku Jesu a chikele, i no wona vanhu vo tala va nga tile ku ta chavelela va ngango wa Jayiro. Jesu i no va byela lezvi: ‘Mu nga rili, a n’wanana loyi i no etlela’. I no gumesa a khoma canja ga n’wanana, aku: ‘N’wanana, vhuka’! A nhanyana i no tekela ku vhuka a tshama zvonake Jesu a byela vapswali vakwe lezvaku va mu nyika ca kuga. Hi nga alakanyela lezvi a vapswali vakwe va nga tsakisa zvona!