Ua tonohia o Iesu i nia i te fenua nei no te faaite i te parau apî oaoa o te Faatereraa arii a te Atua. No te faaite eaha ta Iesu e rave ei Arii, ua horoa Iehova ia ˈna i te varua moˈa no te faatupu i te mau semeio. Ua nehenehe Iesu e faaora i te feia maˈi. I te mau vahi atoa i haere ai oia, ua haere te mau taata e ani ia Iesu i te tauturu e ua faaore oia i to ratou mau maˈi atoa. Ua nehenehe te matapo e ite faahou e te hapepa e haere faahou. Ua faaora atoa o Iesu i te feia tei uruhia e te demoni. Noa ˈtu e ua tapea te taata i te hiti noa o to ˈna ahu, ua orahia mai ratou. Ua pee te mau taata ia Iesu i te mau vahi atoa i haere ai oia. Noa ˈtu e ua hinaaro Iesu e faafaaea o ˈna anaˈe i te tahi taime, aita oia i tiahi i te tahi noa ˈˈe taata.

I te hoê taime, ua afai mai te mau taata i te hoê hapepa i te hoê fare i reira Iesu. Ua î roa râ te fare i te taata e aita ratou i nehenehe e tomo atu. Ua faaapoo ihora ratou i te tapoˈi fare e ua haapou maira ratou i te hapepa ia Iesu ra. Ua parau atura Iesu i te taata: ‘A tia e a haere.’ Ua tia ˈtura te hapepa e ua maere roa te mau taata.

I te tahi atu taime, ua haere Iesu i roto i te hoê oire iti. I te atea, i vai na ahuru tane lepera tei tuô atu: ‘E Iesu e, a tauturu mai na ia matou!’ I taua tau ra, aita i faatiahia i te feia lepera ia haere i pihai iho i te tahi atu mau taata. Ua parau Iesu i taua mau tane ra ia haere i te hiero. Ia au i te ture a Iehova, tera tei titauhia i te feia lepera ia rave i muri aˈe i to ratou faaoraraa. I to ratou haereraa i te hiero, ua ora roa to ratou maˈi. I to ˈna iteraa e ua ora roa oia, ua hoˈi mai hoê o na tane lepera  ahuru no te haamauruuru ia Iesu e no te arue i te Atua. Hoê noa ˈˈe ïa i nia i tera ahuru taata tei haamauruuru ia Iesu.

Ua maˈihia te hoê vahine 12 matahiti i te maoro e ua manaˈo oia aita roa ˈtu oia e ora mai. Tei rotopu o Iesu i te hoê nahoa. Ua haere atura te vahine i muri noa ia Iesu e ua tapea oia i te hiti o to Iesu ahu. I tera iho â taime, ua ora mai oia. I tupu na te reira, ua ani Iesu: “Na vai i tapea ia ˈu?” Ua riaria roa te vahine. Noa ˈtu râ, ua haere oia e faaite ia Iesu i ta ˈna i rave. Ua tamahanahana Iesu ia ˈna ma te parau e: ‘Ta ˈu tamahine e, a haere, eiaha oe e haapeapea.’

Ua taparu te hoê ofitie, o Iaeiro to ˈna iˈoa, ia Iesu: ‘A haere mai na i to ˈu fare! E maˈi rahi to ta ˈu tamahine iti.’ Hou râ a tapae ai Iesu i to Iaeiro fare, ua pohe te tamahine. I to Iesu tapaeraa i te fare, ua ite oia e ua haere mai e rave rahi taata no te oto e te utuafare. Ua parau Iesu ia ratou: ‘Eiaha e taˈi. Te taoto noa ra hoi te tamahine.’ Ua rave atura Iesu i te rima o te tamahine e ua parau: “Tamahine, a tia mai!” I taua iho â taime, ua ara te tamahine e ua parahi oia. Ua parau atura Iesu i to ˈna na metua ia faatamaa ia ˈna. A feruri na i te huru o to ˈna na metua i taua taime ra!