Иисус черже Чагырга дугайында буянныг медээни суртаалдаар дээш чедип келген. Иегова хуулгаазыннарны кылзын дээш база Хаан апаргаш, чүнү кылырын кижилерге көргүссүн дээш, аңаа ыдыктыг сүлдени берген. Иисус дуза дилеп келгеннерни экиртип турган. Согур улус көрүп, дүлей улус дыңнап, аскак улус кылаштап, буктарга хинчектеттирген улус оон хосталып турган. Ол каяа-даа баарга, ону улус тып ап, ооң хевинге дээпкеш безин, экирий бээр турган. Ол чааскаан туруксап тургаш безин, оларны сывыртаваан.

Бир катап Иисустуң турган бажыңынга чартыктаан эр кижини эккелген. Кижилер хөй боорга, ону бажың иштинче киирип чадап каан. Ынчан улус бажыңның девиирин ойбактааш, ол эр кижини Иисусче бадырыпкан. Иисус аңаа: «Туруп келгеш, кылашта!» — деп чугаалаан. Оон ол эр кижи туруп келгеш, кылаштай берген. Ол кайгамчык хуулгаазын болган!

Иисус бир суурга кээрге, ону кеш аарыглыг он кижи көрүп каан. Кеш аарыглыг улус өске кижилерже чоокшулавас турган болгаш, ыракка турганнар. Олар: «Иисус, биске дузалап көр!» — деп алгырышкан. Иегованың хоойлузу-биле алырга, кеш аарыглыг кижи экирий бээрге, ону өргээ бараалгакчызы көөр ужурлуг турган. Ынчангаш Иисус оларны өргээже  чоргузупкан. Орук ара олар экирий берген. Оларның бирээзи Иисуска четтиргенин илередип, Бурганны алдаржыдар дээш чедип келген. Он кеш аарыглыг кижиниң чүгле чаңгызы четтиргенин илереткен.

Бир херээжен кижи 12 чыл ишти аарып келген. Бир катап ол хөй улус аразынга Иисустуң хевинге бүдүү дээпкеш, ол-ла дораан кадык апарган. «Кым меңээ дээпти?» — деп, Иисус айтырган. Херээжен кижи корга бергеш, шынын чугаалаан. Иисус ону оожургадып: «Амыр-тайбың чорувут, кызым!» — дээн.

Иаир деп дарга Иисустан: «Бичии уруум аарып тур, бажыңымче кээп көрем» — деп чаннып дилеп эгелээн. Ынчалза-даа Иисус олче бар чыдырда-ла, ооң уруу чок апарган. Бажың чанынга чоокшулап келгеш, Иисус ол уругнуң төрелдери-биле кады ыглажып турар хөй улусту көрүп каан. Иисус оларга: «Ыглаваңар, бо уруг анаа удуп чыдар ышкажыл» — дээн. Уругнуң холундан тудуп алгаш: «Кызыжак, туруп кел!» — деп чугаалаан. Ол дораан туруп келген. А Иисус ол уругну чемгерип каарын улуска чугаалаан. Ооң ада-иези кайы хире өөрүп турган деп бодаар сен?