Yesu weya palo posi oco a kunde olondaka viwa Viusoma wa Suku. Oco Yehova a lekise ovina Yesu a ka linga Ndosoma, wa eca kokuaye espiritu sandu oco a linge ovikomo. Eye wa ponduile oku sakula ovovei osi. Kolonepa viosi eye a endaele, omanu va vela va enda oku iya kokuaye oco a va kuatise kuenje vosi yavo wa enda oku va sakula. Olomeke via ponduile oku vanja, ovilema via ponduile oku enda, ovisitatũi via ponduile oku yeva kuenda omanu vana va kuatiwile lolondele va ponduilevo oku sakuiwa. Ndaño muẽle va lamba kolunjenje wuwalo waye, va ponduile oku sakuiwa. Omanu va kuama Yesu kolonepa viosi eye a endaele. Ndaño muẽle ceci a yonguile oku kala lika liaye, Yesu lalimue eteke a popele komunu umue okuti si kuete otembo.

Onjanja yimue, omanu va nena ulume umue wa fa ovolu konjo yimue Yesu a sikĩla. Pole, vonjo mueyukile omanu valua okuti ovo ka va tẽlele oku iñila. Omo liaco, va linga epangu limue volusoka kuenje va lowila ulume ku Yesu. Kuenje Yesu wa sapuila ulume hati: ‘Votoka, enda.’ Eci a fetika oku enda omanu va komõha.

Vepuluvi likuavo osimbu Yesu a kala oku iñila vimbo limue, alume ekũi vakuavilundu va talama ocinãla cimue kuenje va kaluka vati: ‘A Yesu tu kuatise!’ Koloneke viaco, omanu vakuavilundu ka ca tavele okuti va amẽla ocipepi lomanu vakuavo. Yesu wa sapuila alume vaco oco va ende konembele, ndomo Ocihandeleko ca Yehova ca popele okuti oco vakuavilundu va sukilile oku linga noke yoku sakuiwa. Osimbu va kala loku enda, va sakuiwa. Eci umue pokati kavo a  limbuka okuti wa sakuiwa eye wa tiuka oku eca olopandu ku Yesu kuenje wa sivaya Suku. Pokati kalume ekũi va sakuiwa, umosi lika wa eca olopandu ku Yesu.

Ukãi umue okuti wa kala loku vela vokuenda kueci ci soka 12 kanyamo, wa sakalalele calua momo wa yonguile oku sakuiwa. Eye wamẽla vokati kowiñi kuenda wa kala konyima ya Yesu kuenje wa lamba kolunjenje wuwalo waye. Vepuluvi liaco, eye wa sakuiwa. Noke yovina viaco, Yesu wa pula hati: “Helie wa ndamba?” Ukãi wa kala lusumba, pole, wamẽla ocipepi kuenje wa sapuila ocili kokuaye. Yesu wo lembeleka poku popia hati: ‘Amõlange, kuende lombembua.’

Usongui umue o tukuiwa hati, Yairo wa livondela Yesu hati: ‘Enju konjo yange! Omõlange ufeko o vela calua.’ Pole, osimbu handi Yesu ka pitĩlile konjo ya Yairo, ufeko wa fa. Eci Yesu a pitĩla wa mola okuti omanu valua va kala oku lila kumue lepata. Yesu wa va sapuila hati: ‘Ko ka lili; eye o kasi ño oku pekela.’ Omo liaco, wa kuata peka liufeko kuenje wa popia hati: “Amõla, votoka!” Vonjanja yaco, haico ufeko a votoka kuenje Yesu wa sapuila olonjali viaye oco vo wĩhe cimue cokulia. Sokolola esanju olonjali viaye via kuata!