Kinanhi hi Jesus ha tuna para isangyaw an maopay nga sumat han Ginhadian. Basi ipakita an iya bubuhaton sugad nga Hadi, gintagan hiya ni Jehova hin baraan nga espiritu para maghimo hin mga milagro. Kaya niya tambalon anoman nga sakit. Diin man hiya kumadto, may-ada mga may sakit nga nakadto ha iya basi mangaro hin bulig, ngan hira ngatanan iya gintambal. An mga buta nakakita, an mga bungol nakabati, an mga paralisado nakalakat, ngan an mga ginsaniban hin mga demonyo nakagawas tikang ha pagin kontrolado hito. Bisan makaptan la han mga may sakit an sidsid han bado ni Jesus, natatambal hira. Nagsinunod an mga tawo diin man hiya kumadto. Bisan han karuyag niya mag-usahan, waray niya igbalewaray an nangangaro ha iya hin bulig.

Usa ka adlaw, may paralisado nga lalaki nga gindara ha balay nga gin-uukyan ni Jesus. Pero damu hinduro an tawo asya waray hira pakakasulod. Salit ginbuhoan nira an atop ngan iginturos an tiheras han paralisado ngadto kan Jesus. Hi Jesus nagsiring ha lalaki: ‘Buhat ngan lakat.’ Han ginbuhat ito han lalaki, nanhipausa an mga tawo.

Ha iba nga higayon, samtang tisulod hi Jesus ha usa nga baryo, may napulo ka tawo nga may liprosi an tinindog ha apartado la ngan nagsinggit: ‘Jesus, buligi kami!’ Hito nga panahon, an mga may liprosi diri puydi humirani ha iba nga tawo. Ginsidngan hira ni Jesus nga kumadto ha templo, sugad han ginsisiring han Balaud ni Jehova nga kinahanglan buhaton han mga may liprosi nga natambal na. Samtang tipakadto, natambal hira.  Pakakita han usa nga naopay na hiya, binalik hiya kan Jesus basi magpasalamat ngan dayawon an Dios. Ha napulo, hiya la an nagpasalamat.

May babaye nga 12 ka tuig na nga may sakit nga karuyag gud matambal. Sumuksok hiya ha mga tawo basi makahirani ha luyo ni Jesus ngan ginkaptan an sidsid han pantungbaw nga panapton ni Jesus. Natambal dayon hiya. Han nahitabo ito, hi Jesus nagpakiana: “Hin-o an kinapot ha akon?” Nahadlok an babaye, pero dinaop hiya kan Jesus ngan iginsumat an ngatanan. Ginliaw hiya ni Jesus ngan ginsidngan: ‘Anak, lakat nga mamurayawon.’

Usa nga opisyal nga Jairo an ngaran an nakimalooy kan Jesus: ‘Pakadto ha balay! Grabe an sakit han akon daragita.’ Pero antes pa umabot hi Jesus kanda Jairo, namatay an daragita. Pag-abot ni Jesus, nakita niya nga damu an nananangis upod han pamilya ni Jairo. Iya hira ginsidngan: ‘Ayaw na kamo pagtinangis; nakaturog la hiya.’ Tapos, ginkaptan niya an kamot han bata ngan nagsiring: “Daragita, buhat!” Binuhat dayon hiya, ngan ginsidngan ni Jesus an iya mga kag-anak nga tagan hiya hin pagkaon. Hunahunaa an daku nga kalipay han iya mga kag-anak!