Yesu ŵayice pacilambo capasi kukwenesya utenga wambone wa Ucimwene wa Mlungu. Yehofa ŵampele Yesu msimu weswela kuti akomboleje kutenda yakusimonjesya pakusaka kulosya yacacitenda Yesu pacaciŵa Mwenye. Jwalakwe ŵaposyaga ulwele uliwose. Kulikose kuŵajawulaga, ŵandu ŵakulwala ŵayikaga kwa jwalakwe pakusaka kuti apate cikamucisyo, ni jwalakwe ŵaposyaga wosopewo. Jwalakwe ŵaposyaga ŵatatale, ŵangapikana, ŵangajenda, soni ŵatyosyaga misimu jakusakala mwa ŵandu. Atamose mundu pagambile kwaya cakuwala ca Yesu, jwapolaga. Ŵandu ŵamkuyaga Yesu kulikose kuŵajawulaga. Nambo jwalakwe nganiŵatopolaga ŵandu atamose pandaŵi jaŵasakaga kupumula.

Ndaŵi jine ŵandu ŵamjigele mundu jwam’we yiŵalo nikwawula najo kunyumba jaŵatamaga Yesu pandaŵijo. Nambo m’nyumbamo mwaliji ŵandu ŵajinji mwamti ŵalepele kwinjila. M’yoyo, ŵapaswile pamsakasa ni ŵamjinjisye mundu jula kupitila pelepo. Kaneko Yesu ŵamsalile mundujo kuti, ‘Mjimuce ni mjende.’ Jwalakwe ali ajesile, ŵandu ŵala ŵasimonjile.

Lisiku line, Yesu ali ajinjile m’musi wine, acalume likumi ŵamatana ŵajimi capakutalicila ni ŵagumisile kuti, ‘Yesu, mtukamucisye!’ M’masiku gelego, ŵamatana nganiŵakundaga kwaŵandicila ŵandu ŵane. Kaneko Yesu ŵasalile acalume ŵala kuti ajawule kunyumba ja Mlungu. Yesu ŵasalile yeleyi atamose kuti Cilamusi ca Yehofa casalaga kuti ŵamatana ŵasosekwaga kwawula kunyumba ja Mlungu paposile. Nambo jemanjaji paŵaliji mkwawula kweleko, ŵaposile ulwele wawo. Jwamatana jumo ali ayiweni kuti aposile ulwelewo, jwawujile kwa Yesu  kukum’yamicila soni kukumlumba Mlungu. Pa ŵandu likumi ŵala, jumope ni juŵam’yamicile Yesu.

Jwamkongwe jwine juŵalwasile kwa yaka 12, jwasacilile mnope ali aposile. Jwalakwe jwam’ŵandicile Yesu cakunyuma kwakwe pasikati pa likuga lya ŵandu. Kaneko ŵakamwile cakuwala cakusa ca Yesu. Mwangacelewa, jwalakwe jwaposile ulwele wakwe. Yeleyi yili yitendekwe, Yesu ŵawusisye kuti, “Ŵani ŵangwayiye?” Jwamkongwejo wamkamwile woga, nambo jwalimbile mtima ni kwawula paŵaliji Yesu ni kumsalila yisyesyene yakwe. Nambo Yesu ŵamlimbikasisye jwamkongwejo mwakumsalila kuti, ‘Mwanangu, mjawule mumtendele.’

Mundu jwine jwa ulamusi jwakolanjidwa Yayilo, jwam’ŵendile Yesu kuti, ‘Kwende kumangwetu, kamwanace kangu kakakongwe kakulwala mnope.’ Nambo Yesu mkanayice kumangwawo Yayilo, kamwanace kala kawile. Yesu ali ayice kunyumba kula, ŵaweni ŵandu ŵajinji ali mkulila. Yesu ŵatite, ‘Alece kulila! Jwalakwe agambile kugona lugono.’ Kaneko ŵawukamwile mkono wa mwanacejo ni ŵatite, “Mwanacemwe mjimuce!” Kamwanaceko kajimwice, ni Yesu ŵasalile acinangolo ŵakwe kuti ampe cakulya mwanacejo. Mgambe ganisya muŵasangalalile acinangolo ŵa mwanacejo?