Jesuseʼ taal way Luʼum utiaʼal u kʼaʼaytik le jatsʼuts baʼaloʼob ken u beet u Reino Diosoʼ. Jéeobaeʼ tu tsʼáaj u kiliʼich muukʼ tiʼ utiaʼal u beetik milagroʼob yéetel utiaʼal u yeʼesik baʼaxoʼob ken u beet ken tsʼaʼabak u beet u Reyil. Jesuseʼ jeʼel u páajtal kaʼach u tsʼakik jeʼel baʼaxak kʼojaʼanileʼ. Jeʼel tuʼuxak ka xiʼikeʼ ku náatsʼal le kʼojaʼanoʼob tu yiknaloʼ, letiʼ túuneʼ ku tsʼakikoʼob. Le chʼóopoʼoboʼ paakatnajoʼob, le kóokoʼoboʼ jeʼepaj u xiknoʼob yéetel le máaxoʼob maʼ tu xíimbaloʼoboʼ xíimbalnajoʼob. Tak chéen ka u machoʼob u flecoil u nookʼ Jesuseʼ ku yutstaloʼob kaʼachi. Jesús xaaneʼ tu jóoʼsaj le demonioʼob okaʼan tiʼ le máakoʼoboʼ. Jeʼel tuʼuxak ka xiʼikeʼ le máakoʼoboʼ ku binoʼob tu paach, tsʼoʼoleʼ mantatsʼ tu yilaj u yáantkoʼob, kex yaan hora taak u pʼáatal chéen tu juunal.

Juntéenjeakeʼ taasaʼab juntúul máak minaʼan u muukʼ u wíinklil teʼ naj tuʼux yaan Jesusoʼ. Chéen baʼaleʼ yoʼolal le yaʼabkach máakoʼoboʼ, maʼ páajchaj u yookloʼobiʼ, le oʼolal tu beetoʼob junpʼéel jool teʼ techo utiaʼal u jalkʼeskoʼob tak teʼ tuʼux yaan Jesusoʼ. Letiʼ túuneʼ tu yaʼalaj tiʼ le máak minaʼan u muukʼ u wíinkliloʼ: ‹Líikʼen, ka xíimbalnakech›. Le ka joʼopʼ u xíimbaleʼ le máakoʼoboʼ jach jaʼakʼ u yóoloʼob.

Uláakʼ juntéeneʼ le táan u kʼuchul Jesús tiʼ junpʼéel kaajoʼ, 10 máakoʼob yaan lepra tiʼobeʼ desde náacheʼ tu yawtoʼobtiʼ: ‹Jesús, áantoʼoniʼ›. Teʼ kʼiinoʼoboʼ maʼatech u chaʼabal u náatsʼal tiʼ u maasil le máaxoʼob yaan lepra tiʼoboʼ. Tsʼoʼoleʼ u Ley Jéeobaeʼ ku yaʼalikeʼ ken utschajkoʼobeʼ unaj u binoʼob teʼ templooʼ. Le oʼolal Jesuseʼ tu yaʼalajtiʼob ka xiʼikoʼobiʼ. Le táan u binoʼob teʼ  templooʼ, utschajoʼob. Juntúul tiʼ letiʼobeʼ ka tu yilaj tsʼoʼok u yutstaleʼ suunaj utiaʼal u tsʼáaik gracias tiʼ Jesús yéetel utiaʼal u alabartik Dios. Tiʼ le 10 máakoʼob yaan lepra tiʼoboʼ, chéen juntúul tu tsʼáaj u graciasil tiʼ Jesusiʼ.

Yaan xan kaʼach juntúul koʼolel 12 años kʼojaʼanchajak yéetel jach ku tsʼíiboltik ka utsak. Le oʼolal tu jupuba ichil le máakoʼob utiaʼal u náatsʼal yiknal Jesusoʼ. Le koʼolel túunoʼ tu machaj u flecoil u nookʼ Jesuseʼ ka utschaji. Jesús túuneʼ tu kʼáataj: ‹¿Máax machen?›. Le koʼoleloʼ sajakchaji, chéen baʼaleʼ náatsʼ tu yiknaleʼ ka tu tsolajtiʼ tuláakal baʼax úuchi. Jesuseʼ tu yaʼalajtiʼ utiaʼal u líiʼsik u yóol: ‹Hija, xeen yéetel uts›.

Juntúul gobernante ku kʼaabaʼtik Jairoeʼ tu kʼáat óoltaj tiʼ Jesús: ‹Koʼox tin wotoch. In chan hijaeʼ jach kʼojaʼan›. Chéen baʼaleʼ táanil tiʼ u kʼuchul Jesús tu yotoch Jairoeʼ, kíim le chan x-chʼúupaloʼ. Ka kʼuch Jesuseʼ tu yilaj yaʼab máakoʼob táan u yokʼoloʼob yéetel u láakʼtsiloʼob Jairo. Jesuseʼ tu yaʼalaj: ‹Xuʼuluk a wokʼoleʼex, chéen táan u wenel›. Tu machaj tu kʼab le chan x-chʼúupaloʼ, ka tu yaʼalaj: ‹Chan x-chʼúupal, ¡líikʼen!›. Le chan x-chʼúupaloʼ tu séebaʼanil líikʼi, Jesús túuneʼ tu yaʼalaj tiʼ u papaʼob ka u tsʼáaʼob baʼal u jaante. ¡Chéen tukult bix tu yuʼubilubaʼob!