Beeda Jesús ndaaniʼ Guidxilayú riʼ para guni predicar ca noticia galán stiʼ Reinu stiʼ Dios. Laaca bidii Jiobá laabe espíritu santu para gúnibe milagru ne gusihuínnibe xi guiráʼ chigúnibe ora gácabe Rey. Bisianda Jesús intiica guendahuará. Ratiica guyebe, yenanda ca binni huará laabe para gacanebe laacaʼ. Bisiándabe cani qué ruuyaʼ, cani qué runadiaga ne cani qué rizá. Stale binni bianda neca xhaba si Jesús gudáʼnaca. Laaca gulee Jesús demonio luguiáʼ binni. Ladu tiica guyebe yenanda binni laabe, qué ñúnibe menu guirutiʼ, dede nin ora gúpabe gana niziiláʼdxibe.

Ti biaje, yenécabe ti hombre ni qué rizá ra ti yoo nuu Jesús. Peru qué ñanda ñuucabe purtiʼ nuu stale binni raqué, ngue runi bíʼnicabe ti huecu ique yoo que para guindétecabe laabe dede ra nuu Jesús. Óraque ná Jesús rabi hombre ni qué rizá que: «Biasa ne guzá». Guizáʼ bidxagayaa ca binni que ora bíʼyacaʼ gunda guzá hombre que.

Sti dxi, laga ziyuu Jesús ndaaniʼ ti guidxi, de zitu bicaa ridxi chii hombre napa lepra laabe: «¡Jesús, gucané laadu!». Dxiqué, qué zanda guidxiña cani napa lepra binni. Ne lu Ley stiʼ Jiobá que ná naquiiñeʼ cheʼ cani napa lepra ra templu que guiándasicaʼ. Ngue runi gudxi Jesús laacabe chécabe raqué. Neza zécabe que biándacabe. Ora bidii tobi de laacabe cuenta maʼ bianda, bibiguetaʼ para gudii xquíxepeʼ Jesús ne gusisaca Dios. De lade guiráʼ chii hombre que la? tobi si bibiguetaʼ para gudii xquíxepeʼ Jesús.

 Laaca guyuu ti gunaa ni maʼ napa 12 iza de cayuniná ti guendahuará malu laa, cumu nuube guiándabe la? ngue runi guyuube lade caadxi binni para guidxíñabe gaxha de Jesús, neza deche gudáʼnabe ñee xhaba ne oraqueca biándabe. Para ná Jesús: «¿Tu gudaʼnaʼ xhabaʼ?». Neca cadxibi gunaa que bidxiña ra nuu Jesús ne gudxi laabe xi cazaaca. Biá Jesús laabe ne guníʼ: «Sicarú guyé xiiñeʼ».

Ti gobernador láʼ Jairo, gúdxibe Jesús: «Gudáʼ ra lidxeʼ. Guizáʼ huará xiiñeʼ». Peru ante chindá Jesús ra lidxi Jairo, guti dxaapahuiiniʼ que. Ora yendabe biiyabe cayuuna guiráʼ binni que. Para gúdxibe laacaʼ: «Maʼ cadi gúʼnatu, nisiaasisibe». De raqué gucuaabe náʼ dxaapahuiiniʼ que ne guniʼbe: «¡Biasa! xiiñeʼ». Oraqueca biasa dxaapahuiiniʼ que, ne gudxi Jesús jñaabe ne bixhózebe gudiicaʼ xiixa gobe. ¡Bixuiʼlú xi biʼniʼ sentir bixhoze ne jñaa dxaapahuiiniʼ que!