Yesu aye ku auru kpotosende ka tungusa gu wene pangbanga nga ga ga Mbori Kindo. Tipa ka yugo gupai Yesu nika mangaha ni Bakindo, Yekova afu ziazia toro fuko ko mangi iˈiriwoapai. Ko aima rengba ka husa ngbatunga akaza dũ. Agu aba ko anaandu ku rogoho, aborokaza anaaye fuoko tipa undo, na ko kini husi yo dunduko. Airavurari anaangera, kisikisi tu aboro yo kini gipai, yosora yosora aboro kini ndu, na aguyo naadu na adaimona tiyo ami kini guari tiyo. Zavura ho i anizadi kina ngba gako roko ni, i aima rengba ka hu be gayo akaza. Aboro anaapekafuo Yesu rogo agu a ba dũ ko anaandu ku rogoho. Zavura tigu regbo Yesu anaaida ka du ni kina nisako, ko anaadonga aboro kusayo te.

Ti gu kura regbo sa, aboro aye na yosora yosora kumba ku rogo gu bambu Yesu aaraka rogoho. Gu bambu re aima hi be ndurumo aboro na ka i arengbanga ka rimo ku dimoyo ya. Sidu, i akoro riibambu yo na ki zogo gu kumba re fuo Yesu ku dimoyo. Fuoho, Yesu aya fu gu kumba re wẽ: ‘Mo guari na ki ndu.’ Ho ko aguari ni ki ndu, kina iriwopai naati ti aboro.

Ti kura regbo sa, wa Yesu aarimo ku rogo gu kura gbaria, akumba bawe naadu na kungu tiyo aru tuturũ kini tangbayo nga: ‘Yesu, mo undo rani!’ Ti agu aregbo re, si anaaidanga aboro kungu ye mbembedi na aboro te. Yesu aya fu agu akumba re wẽ, i ndu ku yekaru yo, kina wai ga Mbori andiko aagumbaha nga si naida aboro kungu mangihe tingbafuo i hu. Ho i aandu ni  koyo, i ahu kina gene. Ho gu kura boro kungu sa abi gupai ni nga ko ima hu, ko akaraga tiko kafu tambuahe fu Yesu na ki fu taarimo fu Mbori. Dagba agu aborokungu naadu bawe re, kina gu ko re sa naafu tambuahe fu Yesu.

Dee sa naawoka tipa agarã 12 adu na bakere nyemu ka hu. Ri aye gii Yesu yo dagba ndurumo aboro ki zadi ngba gako roko. Nibasa, ri ki hu. Ho gipai re amangi ni, Yesu asanahe nga: “Da zadi gi remu?” Gu dee re aima gunde ni kerehe, ono ri andu fuoko kumbatayo na ki pe kina boro gupai nzunzu nangia rengo. Yesu afu wasa furi ni ya ko: ‘Vungu, mo ga zezeredi.’

Gu baira bambutiria rimoko angia Yairo azungadi Yesu ki ya: ‘Mo ye ku kpure yo! Tooni wire nawoka ni kerehe.’ Ono mbata fu Yesu da kua Yairo yo, gu tooni degude re akpi. Ho Yesu ada ni, ko abi gupai nga dungu aboro aima ye kini kpari wa sa na agu aborokporo re. Yesu aya fuyo wẽ: ‘Ka oni kparingo ya; ri naraara.’ Fuoho, ko azadi be gu degude re ki ya: “Degude, ya mi foro, mo gúari!” Ri aguari kuari nibasa, Yesu ki ya fu avunguri, oni fuhe furi ri rihe. Mo berẽnga pa gu ngbarago avunguri arengbe ka du na ni!