I ng’ei ma Yesu ung’io jukwenda 12, egam eloro ku wi got nitundo kaka m’udul dhanu ucoko dhoggi i ie. Udul dhanu maeno giai kud i Galilaya, Yahudi, Turo, Sidon, Cami man yo loka kulo Yordan. Gikelo dhanu m’ubesendiri ku kit twoyo ma tung’ tung’ man jumoko ma pajogi ubesendogi. E Yesu ukeyo kumgi ceke. I ng’eye, ebedo i ng’om iwi got keca man ecaku ponjogi. Ekoro gin ma wacikara nitimo tekene wamito wabed jurimb Mungu. Wacikara ning’eyo nia watie ku yeny pa Yehova man ukwayu waponj nimare. Ento wacopo ngo nimaru Mungu tekene wamaru ngo dhanu mange. Wacikara nibedo dhanu ma ber man m’atira ni ng’atu moko ci, kadok ni judegi mwa bende.

Yesu uyero kumae: ‘Kud wujik nimaru kende kende jurimbwu. Ukwayu bende wumar judegi mwu man wutim kisa ni dhanu kud adundewu ceke. Tekene lembe moko unyothere i kindwu wuku ng’atu moko, cidh i bang’e ndhundhu man wuyik kindwu. Tim ni jumange gin ma in de imito gitim iri.’

 Yesu umio bende juk ma cuu ni dhanu iwi piny mi kum. Eyero kumae: ‘Nibedo jarimb Yehova utie lembe ma pire tek nisagu bedo ku sente lee. Jakwo copo kwalu sente peri ento ng’atu moko mbe ma copo kwalu winjiri peri ku Yehova. Kud wudieng’ iwi gin ma wubicamu, ma wubimadhu kunoke ma wubikendo. Wunen winyo. Mungu bemio igi gin ma gicam saa ceke. Adieng’acwiny copo medo ngo kwo mwu kadok pi nindo acel de. Wupoi nia Yehova ung’eyo gin ma wutie ku yenyne.’

Nwang’u fodi udul dhanu maeno giwinjo ngo nyanok de ng’atu moko ubeweco i ayi ma Yesu uweco ko. Judong dini migi ubed uponjogi ngo ku lembe maeno. Pirang’o Yesu ubino japonji ma dit kumeno? Pilembe gin ceke m’ebed eponjo uai i bang’ Yehova.