Jesusajj 12 apostolonakapar ajllkäna uka qhepatjja, qollut saraqanisajj walja jaqenakajj tantachatäsipkäna ukaruw saräna. Uka jaqenakajj Galilea, Judea, Tiro, Sidón, Siria lugaranakatwa jutapjjäna, Jordán jawir khurkatatsa jutapjjarakïnwa. Jesusan ukarojj usutanaka, demonion mantat jaqenak apanipjjäna. Jupajj taqeniruw qolläna. Ukatsti qollu kayur qontʼasisaw jaqenakar yatichañ qalltäna. Diosan amigopäñatakejj kunsa lurañasa ukwa qhanañchäna: Jehová Diosan yanaptʼapampikiw sum jakassna uk amuyasiñasawa, juparojj munasiñasarakiwa. Ukampis jaqe masisar jan munasksna ukhajj janiw Diosar munasksnati. Taqeniruw suma chuymampi cheqaparu uñjañasa, enemigonakasarus ukhamaraki.

Jesusajj akham sänwa: ‘Janiw amigonakamarukejj munasipjjañamäkiti, jan ukasti enemigonakamarus munasipjjañamarakiwa, chuymatpachwa perdonapjjañama. Maynitejj jumatak coleratächejja, jankʼaki jupan ukar sarasin perdón mayisinim. Kunjam uñjatäñsa munasma ukhamarak mayninakar uñjam’ sasa.

 Kunanakatï utjkistu ukanak toqetjja, Jesusajj suma ewjjanakwa churarakïna. Akham sänwa: ‘Qollqenïñat sipansa, Jehová Diosan amigopäñaw jukʼamp wakiskirejja. Qollqemjja lunthataw apaqeristam, ukampis Jehová Diosan amigopäñjja janiw khitis apaqkiristamti. Ukhamajj jan manqʼatsa, umatsa, isitsa sinti llakisimti. Jamachʼinakat amuytʼam, Diosaw jupanakarojj manqʼa churaski. Janiw wal llakisitam laykojj walja tiempo jakkasmati. Amtapunim: kunas jumatakejj wakisi ukjja Jehová Diosajj sum yatiski’ sasa.

Nayrajj janipuniw Jesusjam suma yatichirir istʼapjjerïkänti. Religión pʼeqtʼirinakajj janiw kuntï Jesusajj yatichkäna ukanak yatichapjjerïkänti. ¿Kunatsa Jesusajj wali sum yatichäna? Jehová Diosan arunakaparjamaw yatichirïna, janiw amuyupak yatichirïkänti.