Dung dipillit Jesus 12 muridna, turun ma ibana sian dolok jala laho ma ibana tu sada inganan. Nunga godang halak disi. Adong na sian Galilea, Judea, Tirus, Sidon, Siria, dohot sian bariba ni sunge Jordan. Diboan nasida do angka na marsahit dohot angka na kesurupan alani suru-suruan na jahat manang malaikat na jahat. Dipamalum Jesus do nasida. Dung i hundul ma Jesus mangajari ma nasida. Dipaboa ma tu nasida aha na ingkon diulahon asa boi gabe dongan ni Debata. Porlu do hita diajari Jahowa jala tahaholongi ma Ibana. Alai ndang boi tahaholongi Debata molo ndang tahaholongi na asing. Ingkon burju do hita tu sude halak dohot ma i tu halak na jahat.

Didok Jesus ma, ‘Unang ma holan donganmu haholongi. Haholongi ma muse halak na jahat jala maaphon ma nasida. Molo hansit roha ni halak tu ho, jumpangi ma ibana jala mangangku sala ma ho. Bahen ma tu halak songon na dipangido roham dibahen halak tu ho.’

 Didok Jesus do muse tu nasida, ‘Umporlu do mardongan tu Jahowa sian hepeng. Boi do ditangko halak hepengmuna. Alai ndang boi ditangko halak pasu-pasu na tadapot ala gabe dongan ni Debata. Unang ma marsak alani sipanganon, siinumon, manang alani pangkean. Ida hamu ma angka pidong. Sai dilehon Debata do nasida mangan. Ndang gabe umganjang umurta molo marsak hita. Ingot ma, diboto Jahowa do aha na porlu di hita.’

Ndang hea dibege nasida adong halak na malo mangajari songon Jesus. Ndang hea halak Parise dohot siboto surat mangajarhon na songon i tu nasida. Boasa Jesus malo mangajari? Alana, Jesus nunga diajari Jahowa.