Kɛ Zezi kpali akoto blu-nin-nɲɔn (12) mun wieli’n, ɔ fin oka’n su lɔ jrali. Ɔ ɔli lika kun mɔ sran kpanngban kpa b’a yia lɔ’n. Sran sɔ mun be fin Galile, nin Zide, nin Tir, nin Sidɔn, yɛ Siri, ɔ nin Zurdɛn’n i bue kun lɔ. Be fali tukpacifuɛ wie mun nin be nga mmusu mun be kle be yalɛ’n be bali. Zezi yoli be kwlaa be juejue. I sin’n, ɔ ko trannin ase oka’n su, kpɛkun ɔ kleli be like. Ɔ kleli like ng’ɔ fata kɛ e yo naan y’a kaci Ɲanmiɛn i janvuɛ’n. Ɔ fata kɛ e wun i wlɛ kɛ e mian Zoova wun, yɛ ɔ fata kɛ e klo i. Sanngɛ sɛ e kloman e wiengu mun’n, e kwlá kloman Ɲanmiɛn. Ɔ fata kɛ e nin sran mun be kwlaa e tran klanman. E kpɔfuɛ mun bɔbɔ’n, ɔ fata kɛ e yo be kpa.

Zezi seli kɛ: ‘Nán amun klo amun janvuɛ mun be ngunmin. Amun klo amun kpɔfuɛ mun wie, yɛ amun yaci sa cɛ klun ufue su. Sɛ sran kun fa amun wun ya’n, amun ko wun i wun ndɛndɛ naan amun se i yaci. Like nga amun klo kɛ sran mun be yo man amun’n, amun yo i kunngba’n man be.’

 Zezi kannin aɲanbeun ninnge mun be kunndɛlɛ’n i ndɛ wie. Ɔ seli kɛ: ‘Sɛ amun tra Zoova i janvuɛ’n, i sɔ’n ti kpa tra sika kpanngban ɲanlɛ’n. Afin awiefuɛ mun be kwla wua amun sika’n. Sanngɛ sɛ amun tra Zoova i janvuɛ’n, amún ɲán suyralɛ kpanngban, yɛ awiefuɛ fi su kwlá wuaman. Amun yaci like nga amún dí’n, annzɛ like nga amún nɔ́n’n, annzɛ like nga amún wlá’n i ti kokolɛ. Amun nian anunman mun. Be ɲan aliɛ be di, afin Ɲanmiɛn nian be lika. Kokolɛ’n kwlá ukaman e nguan ɲanman’n su. Nán amun wla fi su kɛ Zoova si like nga amun sa miɛn i wun’n.’

Be nga be tieli Zezi i ndɛ’n, be wunnin kɛ sran fi siman ijɔ kɛ i sa. Be kpɛnngbɛn mun be nin-a kanman ninnge sɔ mun be ndɛ le. ?Ngue ti yɛ Zezi si like kle sɔ-ɔ? Ndɛ kwlaa ng’ɔ kan’n, ɔ fin Zoova ti-ɔ.