Kenca ipilih Jesus 12 rasulna, nangkih me ia ku sada gunung. Nggo melala kalak si pulung i je. Kalak e rehna i bas daerah Galilea, Judea, Tirus, Sidon, Siria, ras daerah i sebrang Jordan nari. Ibaba kalak e me kalak si sakit ras si kerasuken. Kerina ipepalem Jesus. Dung e, kundul me ia janah mulai ia erkotbah. Ijelaskenna kai si arus silakoken adi ateta jadi teman Dibata. Arus sisadari maka perlu kita penampat Jahwe ras erlajar ngkelengi Ia. Tapi adi la sikelengi kalak si deban, la banci sikelengi Dibata. Emaka, arus mehuli ras bujur perbahanenta man kerina kalak, bage pe man musuhta.

Nina Jesus ka, ‘Ula temandu saja si atendu keleng. Musuhndu pe arus keleng atendu janah nggit kam ngelupaken salahna. Adi lit si merawa man bandu, mis dahi ia janah mindo maaf kam. Lakokenlah lebe si atendu ilakoken kalak man bandu.’

 Ibereken Jesus ka nasehat kerna erta. Nina, ‘Pangen erteman ras Jahwe asangken ndatken mbue sen. Adi sen banci itangko kalak, tapi adi erteman kita ras Jahwe, la lit si banci ngganggusa. Ula kam kuatir kerna kai si man panganenndu, si man inemen, ras si man paken. Nenlah perik-perik. Man nge ia iban Dibata. Adi kuatir pe kam, labo tambah umurndu. Ingetlah, ieteh Jahwe nge kai si iperlukenndu.’

Lenga pernah ibegi kalak e si ngajar bagi Jesus. Peminpin agama kalak e pe la pernah iajarkenna si bage. Engkai maka beluh kel Jesus ngajar? Perban si iajarkenna e rehna arah Jahwe nari.