Éyoñ a maneya tobe minlômane mié 12, Yésus a nga ke nkôle yôp, vôm nsamba bôt ô mbe ô yange’e nye. Bôte bete be mbe be so’o Galilée, Judée, Tyr, Sidon, Syrie, a mefôla mefe ya Jourdain. Be nga soo minkôkone miap, a bôte be mbe be bili mimbia minsisim. Yésus a nga saé bese. Mvuse ya valé, a nga tabe si nkôl, a taté na a ye’ele be. A nga liti jôme bia yiane bo asu na, bi bo bemvôé be Zambe. Bia yiane yemelan azoé dangan ya nsisim, bia yiane fe yé’é nye’e Yéhôva. Ve bi vo’o nye’e Zambe nge bia nye’e ki bôte bevok. Bia yiane bo mbamba nlem a nye’e môt ase, ja’a besiñ bangan.

Yésus a nga jô na: ‘Bi nji yiane nye’e ve bemvôé bangan. Bia yiane fe nye’e besiñ bangan, a jamé bôt a nlem ôse. Nge môt éziñ a wô’ô bia ôlun, bia yiane ji’a ke sili nye njaman. Bia yiane nyoñ bôte bevok avale bia yi na be nyoñe bia.’

 A nga liti fe be avale ba yiane yen akum. A nga jô na: ‘E ne mfi na mi bo bemvôé be Zambe, a lôte na mi bi abui moné. Be ne wube moné wônan, ve be vo’o wub amvôé denan a Yéhôva. Te tyelane minleme yôp ajô jôme ya di, nge jôme ya nyu, nge ke jôme ya jaé. Fomba’ané anon. Môs ôse, Zambe a ve de jôme ya di. Nge mia tyelé minleme yôp, nalé a ye volô jôm. Te mia vuane na, Yéhôva a yem miñyiane mienan.’

Bôte be nji yene môt mfe a yeme’e ye’ele ane Yésus. Betebe ôsu ya miñyebe be nji ye’ele be mam mete. Amu jé Yésus a mbe beta ñye’ele? Amu mam mese a mbe a jô’ô me mbe me so’o be Yéhôva.