Yezu mmaleliye wasakula anamafwara 12, ohitita omwangoni ofiya vali muttitti wa attu. Attuya adhela mmittetteni dha Galileya, Judeya Tiro, Sidoni, Síria, na kobela yina ya Jordau. Ahidhiwana attu ali aredda, ana ejilejile, attiddiwe na adomonyo. Yezu owavuluvutxa otene. Mmaleliye ohigilati vattukuwani mutxiddo mwa mwango, oroma ologa. Iyene ohiloga enfunehu okosa akala ninofuna okala amarho a Mulugu. Kanidduwale wila ninofuna osunza dila dha Yehova vina omukwela. Ebaribariya jowila kinwodheya omukwela Mulugu, oku banigamwidda muttu mukwehu. Nakurumuwele vina nakwele attu otene masiki na amwiddaniya.

Yezu ologa dhahi: ‘Wakwela amarhovi ehu kunakwana. Ninfuniwana wi nakwelege vina amwiddani, nanda nalevelele attu na murima wotene. Akala mukwawo onouliga, onfiyedhe wamuttidde myeddo. Waweddihege eena ninga munfuneliwe weddihiwa.’

 Yezu vina ohalaga attu sabwa ya dhorela. Ohiloga: ‘Enfuneya kukala marho wa Mulugu ottiya ofunetxa kobiri. Sabwa kobiri enowiyiwa na mbava, mbenye omarho wawo na Yehova kavo muttu onwodha wiya. Kamuzuzumeletxe dhowabala, dhoja, obe dhomwa. Kang’anani balame. Mulugu ddinjiha dhetene. Ozuzumela dh’ohikala kahiyo kunnikalihawo. Nubuwelege wila Yehova onoziwa dhinfunehu.’

Muttitti walivo, wali ohinamwiwaga muttu woziva mazu ninga Yezu. Asogorheli awa kasunziha dhilobo ninga esene. Yezu wakalelini namasunziha munddimuwa? Sabwa dhotene dhasunzihiye dhadhela wa Yehova.