Ni digi ratou oti na 12 nona yapositolo o Jisu, a siro mai na ulunivanua me lako vei ira na ilala levu. Era gole mai Kalili, Jutia, Taia, Saitoni, Siria, kei na tai ni Joritani. Era kauti ira yani na tauvimate kei ira na curumi timoni, e mani vakabulai ira kece o Jisu. Oti e dabe me vosa vei ira. E vakamacalataka na ka meda cakava meda itokani kina ni Kalou. E dodonu meda kilai Jiova da qai lomani koya. Ia eda na lomana ga na Kalou ke da dau veilomani. E bibi gona meda yalovinaka da qai caka dodonu, vei ira mada ga na keda meca.

E kaya o Jisu: ‘Kua ni lomani ira ga na nomu itokani. E bibi mo lomani ira tale ga na kemu meca qai dauveivosoti mai vu ni lomamu. Ke o vakararawataka e dua, mo totolo ni kere veivosoti. Na ka ga o vinakata me caka vei iko, cakava tale ga vei ira.’

 E vakasalataki ira tale ga o Jisu ena ka e vauca na iyau. E kaya: ‘Na noda veitokani kei Jiova e bibi mai na ilavo. E rawa ni butakoca nomu ilavo na daubutako, ia ena sega ni butakoca rawa nomu veitokani kei Jiova. Kua ni lomaleqataka na ka mo kania, gunuva se tokara. Raici ira mada na manumanuvuka. E raica na Kalou me tiko na kedra. Na lomaleqa ena vakalekalekataka nomu bula. Nanuma tiko ni kila o Jiova na ka o gadreva.’

Era se sega ni rogoca na ilala levu e dua me veivakavulici vakataki Jisu. Era sega ni cakava qori na iliuliu ni lotu. Na cava e qasenivuli levu kina o Jisu? Ni ka kece e vakavulica e vu mai vei Jiova.