Nachdem Jesus di 12 Aposchtel usgwählt het, gaht er vom Berg obenabe. Unde hend sich vil Mensche versammlet. Si sind vo Galiläa, Judäa, Tyrus, Sidon, Syrie und vo de andere Siite vom Jordan cho. Si hend vil mitgno, wo chrank sind oder vo Dämone plaget werded. Und Jesus macht si alli gsund. Nachher sitzt er hii und fangt a lehre. Er erklärt, wie mir Fründe vo Gott chönnd werde: Mir müend Jehova gern ha und immer dra denke, dass mir ihn bruched. Aber mir chönnd Jehova nume gern ha, wenn mir au üsi Mitmensche vo Herze gern hend. Mir müend zu allne fründlich und fäär sii, sogar zu üsne Feinde.

Jesus seit: «Es längt nid, wenn ihr nume eui Fründe gern hend. Tüend au eui Feinde gern ha und vergend andere vo Herze. Wenn öpper verruckt isch uf euch, göhnd sofort zu ihm hii und mached Fride. Tüend anderi eso behandle, wie au ihr vo ihne behandlet werde möchted.»

Jesus hilft de Mensche au, dass si über s Geld und di Sache, wo si hend, richtig denked. Er seit: «Es isch wichtiger, en Fründ vo Jehova z sii, als vil Geld z ha. Eues Geld cha gstohle werde, aber eui Fründschaft mit Jehova cha euch niemer wegneh. Höred uf, euch Sorge z mache, was ihr wend esse, trinke oder alege. Lueged emal d Vögel a. Gott luegt, dass si gnueg z Fresse hend. Wenn ihr euch Sorge mached, lebed ihr keis bizeli länger. Denked dra: Jehova weiss, was ihr bruched.»

D Lüt hend no nie öpper ghört, wo eso cha rede wie Jesus. Ihri religiöse Füehrer hend ihne die Sache no nie biibracht. Wiso isch denn Jesus eso en guete Lehrer? Wil alles, wo er seit, vo Jehova chunnt.