Jesukwe nitre apóstol 12 dianinkä ye bitikäre, niara nämene ngutuäbiti nikani nementa ngösöri aune nitre kwati krubäte nämene ja ükaninkrö yekänti namani. Nitre kä Galilea, Judea, Tiro, Sidón, Siria aune kä ñö Jordán ye kwäräkri jatani nüke. Nitre bren o nitrebätä chokali nämene jänjatani nüke aune Jesukwe nitre ye jökrä mikaninta räre. Niara namani täkäni ngutuä ngürebätä aune namani blite nitre ben. Ni tö rabai ja ketamuko Ngöbökwe angwane nikwe dre nuaindre ye mikani gare kwe nitre ie. Jehovakwe ni dimikadre nita ribere jai ye nikwe mikadre nüke gare jai aune nikwe niara taredre. Akwa, ni ñaka ni mada tarere angwane ni ñaka raba Ngöbö tarere. Ni töi tädre kwin aune nikwe ja töi mikadre kwin nitre jökrä kräke, nitre tä ja mike ni rüere ye kräke arato.

Jesús niebare: ‘Ja ketamuko mäkwe ye mäkwe taredre ye ñan aibe, ñakare aune mäkwe nitre mä rüe ye taredre arato aune ngite juandre ta niaratrebiti ja brukwä tätebiti. Mäkwe ni mada mikadre rubun ja kräke raba tuin mäi ye ngwane, jötrö ngwarbe mäkwe ngite juamana ta jabiti ie. Ni mada mä mikadre tuin ño jai ie mä tö ye erere mäkwe nitre mada mika tuin jai’.

 Dre dre tä nikwe yebätä Jesukwe kukwe kwin mikani gare arato. Niebare kwe: ‘Nikwe ja ketadre Jehovabe ye bäri ütiäte ngwian ye kräke. Ñobätä ñan aune ni gokä raba ngwian goire mäkän, akwa mätä ja kete Jehovabe ye ni ñaka jire iti raba goire mäkän. Ye medenbätä, mrö, tomana o dän yebätä mäkwe ñaka töbika krubäte. Mä raba nukwä ye mike ñärärä. Ngöbö tä käre ngübare ne kwe mrö tätre kwetadre ietre. Mäkwe töbikadre krubäte akwa yebiti ta mä ñaka raba nüne jankunu. Mäkwe ngwan törö jai, mätä dre ribere jai ye käre gare Jehovai’.

Jesús nämene kukwe kädriere abokän erere nitre mada ñaka nämene nuainne jire. Nitre ji ngwanka ye ñaka nämene kukwe ye kädriere nitre ben. ¿Ñobätä Jesús namani dirikä kwin krubäte? Ñobätä ñan aune kukwe jökrä kädrie nämene kwe ye nämene kite Jehovakri.