Jesus tja za nokutoorora ovaapostele 12, eye wa heruka kondundu nai koṋa ku kwari otjimbumba tjovandu mba wongara mbo. Owo va zire koGalilea, Judea, Tirus, Sidon, Sirie, na kotukondo twarwe twaJordan. Owo va eta ovandu mba verere na varwe mba pandekerwe i ozombepo ozohakohoke. Jesus we ve verura avehe. Okuzambo eye wa haama meṋe yondundu na utu okuhungira. Eye wa kahurura kutja matu sokutjita vi kutja tu rire omapanga waMukuru. Twa sokutjiwa kutja tu hepa Jehova nu twa sokurihonga okumusuvera. Posiya kamaatu suvere Mukuru tjondovazu katu yasuvera ovakwetu. Eṱe twa sokukara notjari natu tjiti ousemba kovandu avehe, nandarire ovanavita na eṱe.

Jesus wa tja: ‘Okusuvera omapanga woye uriri kaku ya yenena. Ove wina mo hepa okusuvera ovanavita na ove nokuisira ovandu okuza komutima. Omukweṋu tje kupindikire, hakahana okuyenda ku ye nu u kaningire ondjesiro. Tjinda ovakweṋu omuano ove motjovanga okutjindwa.’

 Jesus wina wa yandja omuhunga omuwa kovandu ohunga nomautumbe wouye. Eye wa tja: ‘Ounanḓengu tjinene okurira epanga raJehova komeho yokukara novimariva ovingi. Omarunga maye yenene okuvaka ovimariva vyoye, posiya kape nomundu ngu ma yenene okuvaka oupanga woye kuna Jehova. Amu rikende kutja mamu ri tjike nu mamu nu tjike poo mamu rihwikike tjike. Tareye kozonḓera zokuti. Mukuru aruhe u ze pa ovikurya. Okurikenda kamaa ku reparisa omuinyo woye. Zemburukeye kutja Jehova u tjiwa kutja eṋe mu hepa tjike.’

Ovandu ovengi mba kavena indu va zuvire omundu warwe ama hungire otja Jesus nai. Ovanane vawo vozongamburiro kave ya rora okuvehonga oviṋa mbya sana ngo. Ongwaye Jesus tjari omuhonge omunene nao? Orondu oviṋa avihe mbyaa hongo aavi zu ku Jehova.